Wezîrê Karên Derve yê Amerîkayê Antony Blinken piştî rûxîna rejîma Beşar Esed ji gotûbêja li ser rewşa dawî çû Enqereyê û li gel Recep Tayyîp Erdogan civiya.
Wezareta Karên Derve ya Amerîkayê ragihand ku Serokkomarê Tirkiyeyê Recep Tayyîp Erdogan li Enqereyê pêşwaziya Wezîrê Karên Derve yê Amerîkayê Antony Blinken kir û di hevdîtinê de mijarên “hevkariya bihêz a herêmî ya di navbera Amerîka û Tirkiyeyê de” û “piştgiriya pêvajoya veguhestina siyasî ya li Sûriyeyê” hatin gotûbêjkirin.
Li ser hevdîtina Erdogan û Blinken Wezareta Karên Derve ya Amerîkayê daxuyaniyeke nivîskî belav kir.
Di daxuyaniyê de hat gotin:
“Wezîr Blinken li ser hevkariya herêmî ya xurt a Amerîka-Tirkiyeyê û berjewendiyên me yên hevpar ên ji bo piştgiriya veguheztina siyasî ya ji bo hikûmeteke berpirsyar û berfireh a Sûriyeyê nîqaş kir.”
Hat diyarkirin ku di hevdîtinê de li Sûriye û Rojavayê Kurdistanê pêwîstiya rêzgirtina mafên mirovan, pabendbûna bi hiqûqa mirovî ya navneteweyî û parastina sivîlan û endamên komên kêmneteweyan hate nîqaşkirin.
Di daxuyaniyê de hat ragihandin ku Blinken bal kişand ser girîngiya alîkariya ji bo koçberên li Sûriyeyê û berdewamiya erkê Hevpeymana Navneteweyî ya li dijî DAIŞê.
Hat destnîşankirin ku Blinken di heman demê de li ser pêdiviya bilez a peymana agirbestê ya li Xezeyê jî nêrînên xwe anîne ziman.