Di 24 demjimêrên bihorî de hêzên Amerîkayê duyemîn operasyon di nav axa Sûriyê û Rojavayê Kurdistanê de pêk anîne û Amerîkayê ragihand, Cîgirê Waliyê DAIŞê li Sûriyê û berpirsekî din ê wê rêxistinê hatine kuştin.
Fermandariya Navendî ya Hêzên Amerîkayê (CENTCOM) di daxuyaniyeke nivîskî de ragihand, “êvara roja Pêncşembê demjimêr 18:32 bi dema Sûriyê hêzên Amerîkayê êrîşeke esmanî ya serkeftî li bakurê Sûriyê pêk anîne.”
Li gor CENTCOMê di operasyonê de “Cîgirê Waliyê DAIŞê Ebû Haşim El-Omewî û berpirsekî din ê pilebilind ê wê rêxistinê ku pê re bûye, hatine kuştin.”
Derbarê zirarên operasyonê de, Fermandariya Navendî ya Hêzên Amerîkayê dibêje, ti zirarek negihîştiye xelkên sivîl, herwiha ti serbazekî Amerîkî birîndar nebûye û nehatiye kuştin û ti zirarek negihîştiye kelûpelên serbazî yên wî welatî.
Fermandarê Fermandariya Navendî ya Hêzên Amerîkayê Michael Erik Kurilla derbarê operasyonê de ragihandiye, “Ev êrîş şiyana DAIŞê ji bo ne aramkirina navçeyê û êrîşkirina ser hêzên me û hevalbendên me kêm dike.”
Erik Kurilla herwiha dibêje, hêzên wan dê li navçeyê bimînin ji bo ku ji têkçûna DAIŞê piştrast bibin.