Li gor zanyariyên taybet ku Rûdawê ji nav herêma Efrînê bidest xistine, di nava 8 mehên borî de, 732 malbatên koçber vegeriyane herêma Efrînê. Ew malbat ji kampa Şehba, Heleb û başûrê Kurdistanê vegeriyane.
Li gor dîmenên bi dest Rûdawê ketine tê dîtin malbateke Efrînî ji koçberiya neçarî vegeriyane nav mal û kes û karên xwe. Tevî zehmetî û astengiyên cor bi cor li pêş vegera koçberên Efrînî, lê ew bi her awayî hewla vegerê bo herêma xwe didin.
Li gor zanyariyên taybet ku Tora Medyayî ya Rûdawê ji nav Efrînê bidest xistine:
732 malbat di 8 mehan de vegeriyane herêma Efrînê. 1-7 kesan hejmara endamên malbatên vegeriyane. 280 malbat vegeriyane navenda bajarê Efrînê. 170 malbat vegeriyane nehiyeya Şera. 282 malbat vegeriyane 5 nehiyeyên din ên herêmê.
Ji bo hêsankirina vegera koçberên Efrînî, Xidir Hemo, çalakvanê Efrînî ku dosyeya vegerê dişopîne, ji Rûdawê re got, divê rêgirî li koçberan neyê kirin û li nav Efrînê garantî bo wan bên dayin.
Li gor çavkaniyên ku ji nav Efrînê ji Tora Medyayî ya Rûdawê re axivîne, yek ji astengiyên li ber koçberên vegeriyayî ew e ku malên wan ji aliyê grûpên çekdar û malbatên wan ên hawirde ve desteserkirî ne. Heman çavkaniyan ji Rûdawê re dan zanîn ku valakirin û radestkirina malên koçberan dê wan bêhtir han bide ku vegerin herêma xwe.
Welatiyên Kurd li Efrînê di rewşeke xirab de dijîn, binpêkarî û siyaseta cudakariya di navbera wan û Erebên hawirde de berdewam e, niha ew ji alîkariyên mirovî jî tên bêparkirin.
Rûdaw