Ji nêzîkî hefteyekê ye agir bi çiyayên navçeyên Raco û Bilbilê yên Efrînê ketiye û rûberên fireh ji dar, zevî û daristanan şewitîne û agir heta niha bi temamî nehatiye kontrolkirin.
Ji roja 23ê Tîrmehê ve agirekî mezin bi çiya û zeviyên gundên navçeyên Raco û Bilbilê ketiye. Berevaniya Sivîl ya li Efrînê dibêje, ji ber belavbûna agir bi dehan hîktar erd, darên zeytûnan, meywe û dar û kelemên daristanan şewitîne û ziyan gihîştiye ajelên çolê jî.
Bi gotina endamên tîmên Berevaniya Sivîl, wan bi hemû hêza xwe hewl dane ku agir bi zûtirîn dem vemirînin, lê ji ber astengî û zehmetiyan nekarîn agir bi temamî kontrol bikin û agir ziyaneke mezin gihandiye zevî û daristanên navçeya Raco.
Endamê Berevaniya Sivîl Qasim Merzûq ji K24ê re got: “Em hatin agahdarkirin ku agir bi navçeyê ketiye, em hatin gundê Şingêlê me dît ku agir ji 4 aliyan ve bi deverê ketiye. Me beşek ji agir vemirand, lê ji ber astengiyan û nebûna rêyan, me nekarî xwe bigihînin piraniya cihên agir. Agir berfireh bûye û deverên dide ber xwe.”
Qasim Merzûq diyar kir jî: “Ziyanên ku gihîştine herêmê mezin in û ne tenê dar û daristan şewitîne, lê ziyan gihîştiye ajelên herêmê û keskatiya herêma Efrînê bi giştî.”
Li gorî çalakvanan, tîmên agirkujê û aliyên pêwendîdar zû û wek tê xwastin destêwerdan nekirine û gundiyan bi alavên li ber dest hewl dan ku agir vemirînin, lê ji ber ku agir belav bûye, hewlên wan bê encam mane.
(K24)