Serekê Pêroyî yê PAKî Mustafa Özçelik: Vengdayîşê ma semedê pawitiş û wayîrvejyayîşê qezencanê netewî, niştimanî yê Başûrê Kurdistanî yo

Me sey PAK roja 17.12.2020 de venga Birêz Serek Mesûd Barzanî, Birêz Sereka Parlamentoya Herêma Kurdistanî, Serekê Herêma Kurdistanî, Serekê Hukmatê Herêma Kurdistanî da.

Me di banga xwe de pir bi zelalî weha gotibû:

“Ma sey Partiya Azadîya Kurdistanî bi zelalî vanê, kam serwerîya îqtîdarê Herêma Kurdistanî, Parlemento, Hukmat û Serekîya Herêma Kurdistanî çîne bihesibno, nas neko û binpay biko, ma înan şermezar kenê. Kam biwazo qezencanê netewî û niştimanî yê Herêma Kurdistanî orte ra wedaro, zerar bido ci, texrîb biko, ma înan şermezar kenê. Kam ke hêrîşê hêzanê Pêşmerge biko, ma înan şermezar kenê. Kam ke biwazo Rojavayê Kurdistanî de xebate û teşebûsanê yewîtîya Kurd û Kurd orte ra wedaro, zerar bido ci, ma înan şermezar kenê. Kam ke ofîsanê ENKSyî vêşneno, hêrîşan keno û zerar dano Kurdan, ma înan şermezar kenê.....La êdî vatiş, vengdayîş, şermezar kerdiş bes nêkeno. Ganî semedê pawitiş û hetkarî û wayîrvejyayîşê qezencanê federe yê Herêma Kurdistanî, gamê neweyî bêrê eştene. Semedê ney zî ez venga Birêz Serek Barzanî, Birêzan Sereka Parlamentoya Herêma Kurdistanî, Serekê Herêma Kurdistanî, Serekê Hukmatê Herêma Kurdistanî dana. Gereke ca de semedê na babete kombîyayîşêko îstîsnayî, acîl virazêne û venga heme partîyanê Kurdan ê çar parçeyanê Kurdistanî û temsîlkaranê Kurdan yê welatanê dinya bidêne, na mesela bi zelalî ma rê aşkere bikêne û ma qisey bike û ma bieşkê helwestêka netewî û niştimanî pîya nîşan bidim. Başûrê Kurdistanî de tehlûkeyêko pîl ewro vernîya Kurdan de yo û no tehlûke hêdî hêdî verê xo dano Rojavayê Kurdistanî zî. No tehlûke do bi temamî tesîrê qederê Kurdan û Kurdistanîyan biko. Ez behsê Kongreya Netewî nêkena. Şertê Kongreya Netewî çin yo. La semedê na mesela lazim o kombîyayîşêk bêro viraştene’’.

Belê vengdayîşê ma no bi. Ma nika zî nê vengdayîşê xo tekrar kenê.

Hêrişêko pîl û plankerde esto ke, wazeno zerar bido qezencanê Başûrê Kurdistanî, wazeno serwerî û estbîyayîşê nê qezencan çîne biko.

Semedê nê tehlûkeyî gereke semedo ke ma bi veng û helwestêka xurte û hîra vera hêrişê ke ser Herêma Kurdistanî, hêrîşê ke ser hêzê pêşmergeyanê Kurdistanî benê,   vejîyê; Semedo ke ma  wayîrê qezencanê netewî, niştimanî yê Dewleta Federe vejîyê; Semedo ke ma vaje, Kerkûk û Şingal û heme erdê îşgalkerde yo babeta madeya 140î erdê Kurdistanî yo û gere ageyro ser Rayberîya Herêma Kurdistanî, gere derxal kombîyayîşêk bêro viraştene.

Dewletê ke ewro bi meseleya Kurd û Kurdistanî de rîbirî yê, nêwazenê Kurdî tu parçeyêkê Kurdistanî de rehetîyêk bivînê, qezencê înan apey kewenê. Û tay hetê ke nameyê Kurdan ser o têgêrenê zî, çi heyf ke bi kerdênanê xo rayîrê ê xeyrnêwazan akenê ke zerar bireso qezencê ke nika estê rê. Coka ma veng danê, eke tay xeyrnêwazê Kurdan plan û projeyê înan estê, ganî sey hetê Kurdan plan û projeyê ma zî estbê.

Birêzan Sereka Parlamentoya Herêma Kurdistanî, Serekê Herêma Kurdistanî, Serekê Hukmatê Herêma Kurdistanî, temsîlkarê resmî, meşrû, weçînayî yê şarê ma yê Başûrê Kurdistanî yê. Birêz Serek Mesûd Barzanî, serek û raybero ke hetê dewletanê dinya ra qebûl bîyo, yew Ronayox û Yewin Sereko weçînayî yê Dewleta Federe ya Herêma Kurdistanî yo, hetê raya pêroyî yê her çar perçeyanê Kurdistanî rêzdar o ci ra bawer beno..

Semedê na rastîye zî, o tewr  maqûl no yo ke, semedê pawitiş (seveknayîş) û wayîrvejyayîş û rêzgirewtiş û qebûl kerdişê qezencan û serwerîya Herêma Federe ya Kurdistanî, merdim venga hetanê Kurdan biko. Ganî ma heme Kurdê dinya zî, kişta Rayberîya Federe ya Herêma Kurdistanî de bê û ma vaje, heme dewletê herême û dinya, heme hêzê çekdar û sîyasî ganî serwerîya meşrû ya Dewleta Federe ya Herêma Kurdistanî rê hurmet nîşan bidê. Û gere ma bi yew veng venga PKKyî bide ke, fek  heme hêrîşanê xo yê ser hêzê pêşmerge ra verado û Şingal de, Kerkûk de û heme Başûrê Kurdistanî de, qerar û Serwerîya Rayberîya Meşrû ya Federe ya Herema Kurdistanî rê hurmet nîşan bido. Ger ma bi yew veng vera heme tewir hêrîşê ser Herêma Kurdistanî vinde, ma na dewleta xo, nê qezencanê xo rê wayîr  vejîyê. Tay xeyrnêwazî wazenê şarê ma yê her çar perçeyanê Kurdistanî yewbînan ra dûrî bikê,  yewbînan ra serdim bikê, ganî ma destûr nêde na plana xeyrnêwazan.

Ma vanê, Birêz Serek Mesûd Barzanî, Birêzan Seroka Parlamentoya Herêma Kurdistanî, Serekê Herêma Kurdistanî, Serekê Hukmatê Herêma Kurdistanî bi na wesîle û armancî kombîyayîşêk virazê. Eke no kombîyayîş bêro viraştene do rayîrê vernîya tehlûkeyî û şaşîtîyan bêro girewtene. Û eger venga ma bidê, ma do ey PAK bi zerweşî beşdarê ê kombîyayîşî bibe. Û Birêz Serek Mesûd Barzanî û birêzan Rayberîya Dewleta Federe ya Kurdistanî bi na wesîle û armancî venga kamî bido ma do hurmet nîşanê qerarê înan bide.  Ma na bawerîye de yê ke, kombîyayîşêko wînasî semedê xurtkerdişê helwestêka wîna netewî, niştimanî ya hempare ya semedê pawitiş û wayîrvejyayîşê Dewleta Federe ya Başûrê Kurdistanî lazimtîyêka tarîxî ya. Û ma  na bawerîye de yê ke Birêz Serek Mesûd Barzanî, Birêzan Seroka Parlamentoya Herêma Kurdistanî, Serekê Herêma Kurdistanî, Serekê Hukmatê Herêma Kurdistanî, do başê bizanê ke semedê nê kombîyayîşî venga kamî bidê. Ma gere  hurmetnîşanê înan bide û verde wa ê bi xo ney tesbît bikê.

Bi Hurmetanê Xo

20.12.2020

Mustafa Özçelik

Serekê Pêroyî yê PAKî