Li gor nûçeya Rûdawê Serokwezîr Nêçîrvan Barzanî îro Yekşemî 5ê Tebaxa 2018 di bersiva pirsa hevwelatiyekî xelkê Silêmaniyê ya derbarê yekgirtina hêzên pêşmerge de ragihand: “Rastiyek heye, ew jî ev e ku me dîrokeke nexweş ji kêşeyên navxwe û meseleya yekgirtina Hêza Pêşmerge heye, lê belê ya giring ev e ku piştî wan rojên nexweş ên şerê navxwe, heta niha ew du hêz gelek bi başî bi hev re kar kirine.”

 

 

 

Serokwezîrê Hikûmeta Herêma Kurdistanê herwiha bernameya niha ya hikûmetê aşkere dike û dibêje: “Bernameya Hikûmeta Herêmê ev e; hêzên 70 û 80 û hêzên din li Wezareta Pêşmerge bêne komkirin û heta niha jî me kariye ku komek ji wan hêzan kom bikin.”

 

Nêçîrvan Barzanî  wisa domand: “Gelek mixabin piştî sala 2014ê ku şerê DAIŞê dest pê kir û hemû hêz mijûlî berevanîkirina li Kurdistanê bûn, ev prose rawestiya, lê belê niha dema wê yekê ye, ku em careke din dest bi vê proseyê bikin. Komeke zêde ji wan di jêr sîwanekê de kom bûne û Wezareta Pêşmerge serpireştiya wan dike, ew ên mane jî û li derveyî Wezareta Pêşmerge ne, Hikûmeta Herêma Kurdistanê niha plana wê yekê heye, ku ji bo wan jî careke din di jêr sîwana Wezareta Pêşmerge de wan kom bike. Ez nizanim ev prose wê kîngê bi dawî bibe, lê tekez ev yek ji ewlehiyên (karên herî li pêş) Hikûmeta Herêma Kurdistanê ye û bi tekezî em ê vî karî pêk bînin.”