Fehd Hamîd ku Heşda Şeibî, wî weke qaymeqamê nû yê Şingalê didin naskirin, dibêje, êdî dawî li encûmena berê ya Şingalê hat û tekez dike: “Em rê nadin Şingal vegere ser Herêma Kurdistanê”.

 

Fehd Hamîd got: “Em îro encûmena qezaya Şingalê ji bo çareserkirina kirîzan û bi awayekî demkî radigihînin û pîlanên parçekirin û giştpirsiya cudaxwaz tune bikin, ev jî di encama gelek civînên ligel eşîr û texên civakê de bû,

 

Ji bo avakirina pêkvejiyana aştiyane, ji bo avakirina yekîtiya navçeya Sincarê (Şingalê) ez hatime vê derê, ji bo ku destê xwe bixin nav destê hev û xizmetê pêşkêşî xelkê Sincarê bikin”.

 

Li aliyeke din rêveberiya yasayî ya Şingalê ku pêştir di encama hilbijartinan de hatiye ser kar, pêkanîna encûmenek din li derveyî rêbazên yasayî û bêyî encamdana hilbijartinan li Şingalê red dike.

 

Qayimeqamê Şingalê, Mehma Xelîl wê encûmena ku bi piştgiriya Heşda Şeibî hatiye pêkanîn, red dike û dibêje, ew encûmen saxte ye û ji bo zêdekirina aloziyan û têkdana rewşa Şingalê hatiye çêkirin.

 

Mehma Xelîl herwiha dibêje, ti rewaiya yasayî û destûrî ya encûmena nû nîne.