2ê Temmuza 1993î de roşnvîr û hunermendî ke seba ke beşdarê Şayîya Pîr Sultan Abdalî bibê ameybî Sêwas, înan ra 33 tenî bi vêşnayîşê Otêla Madimakî dinyaya xo bedilna. Na roje tarîxê Tirkîya de sey roja sîyaye cayê xo girewte.

Înan ra tay kesî sey Azîz Nesîn, Metîn Altiok, Hasret Gultekîn, Nesîmî Çîmen, Asim Bezîrcî û Ugur Kaynar nuştox û hunermendê namdarî bî.
Qirkerdişê ra di rojî verê cû pê vilawê behsê meqaleyêka Azîz Nesînî amêne kerdene ke Nesînî kitabê Salman Ruşdîyî yê bi nameyê ''Ayetê Şeytanî'' ra açarnaybî. Bi no qayde Azîz Nesîn amebi hedefkerdene.
2ê Temmuze nimajê îneyî ra dima qefleyêk pê sloganan ver bi merkezê kulturî yê aktîvîteyan şi. Komêk peykerê ''Ozanê şarî'' şikna û erdî ra kaş kerdêne. Saete 18:00 de verê Otêla Madimakî de hema hema 15 hezar kesî ameybî pêser.

Verê otêle de peyker û wesayîtî ameybî vêşnayene û pancerayê otêle şikîyaybî. 2 saetan ra dima otêle amey vêşnayene. Hêzê xelisnayîşî zî wextê xo de nêameyî û êyê ke ameyî zî tay bîyî. 35 tenan otêle de dinyaya xo bedilna. Înan ra 33 tenî beşdarê şayî bîyî, 2 kesî zî xebatkarê otêle bîyî.
Serekwezîra ê çaxî Tansu Çîller derheqê şewatê Madimak Otêle de nê çîyî vatbi: ''Homayî ra şikir bo ke zerarêk nêresa şarê ma yo ke teberê otêle de bi.''

Serekkomarê ê çaxî Suleyman Demîrelî zî serebût sey ''rijîyayîşê otêlêke''name kerd. Reyna Wezîrê Karanê Zereyî yê ê çaxî zî Azîz Nesîn pê îdîaya tahrîkkerdişî sûcdar kerdêne.

Avûkatanê versûcan ra Wezîrê Edaletî yê Îqîtdarî Refahyolî Şefket Kazanî wextê wezîrîye xo de ê zîndan de zîyaret kerdî. Reyna ê avûkatî mîyanê partîya AKP û Partîya Saadetî de ca girewtî.
 Îdîanameyê dewaya serebûtî de sey sûcdarî beşdarê şayîye û estbîyayîşê Azîz Nesînî ameyî mojnayene. Dewa de ame îfadekerdene ke 'çalakîye' vera Azîz Nesînî bîye.

Derheqê 22 versûcan de 15 serran, derheqê 2 versûcan de 10 serran, derheqê 54 versûcan de 3 serran û derheqê 6 versûcan de 2 serran cezaya zîndanî ameye dayene. Derheqê 37 versûcan de zî bira veradayîşî ameye dayene. La na bire temyîz bîye. Hukmkerdişê dergî ra dima versûcan ra 33 tenî cezaya muebedî girewte, 4 versûcan rê cezaya zîndanî ya 20 serran û versûcêkî rê zî cezaya zîndanî ya 15 serran ameye dayene.

Dewa, temyîz û waştişanê avûkatan bi serran dewam kerd. Dewaya Qirkedişê Sêwasî 20 serran ra dima pê bahaneya ''wextê ci vîyarto'' ameye qefilenayene. Merdim, avûkat, partî û rêxistinanê komelê sivîlî waşt ke dewa dewam bikera la waştişê înan nêame caardene.

Avûkatanê dewaya Qirkerdişê Sêwasî  bira qefilîyayîşê dewa temyîz kerde la sûcdarê qirkerdişî hema zî nêameyî hukmkerdene. Xeylê sûcdarî remayî teberê welatî. Tewr peynî de emser aşma çele de sûcdaranê qirkerdişî ra Ahmet Turan Kiliç zî pê efûyo taybet yê Serekkomarî ame veradayene