Hakîm Dalo ke qezaya Meramî ya Konya de hetê nîjadperestanê tirkan ra kişîya ame definkerdiş.

60 nîjadperestanê tirkan 21ê temmuze de taxa Çarlikoyî ya qezaya Meramî ya Konya de hêrişê kurdan kerdbi û hêriş de Hakîm Dalo 43 serre amebi qetilkerdene.

Cenazaya Dalî goristanê Tatlicakî yê Karahuyukî de ameye definkerdene. 

Hêrişî ra dima 20 kesî ameybî destbendkerdene. Avûkatê keyeyî Abdurrahman Karabulutî pare kerd ke seba destbendkerdişê hêrişkeranê bînan xebatî  dewam kenê.

ÎHDyî da zanayene ke 2020 de 14 hêrişê nîjadperestî ameyî kerdene û 3ê ci domanî 7 sûrîyeyîjî ameyî qetilkerdene, 32 kesî birîndar bîyî. 2010 ra nata tewr tay 280 hêrişê nîjadperestî ameyî kerdene û nê hêrişan de 15 kesî kişîyayî, 1097 kesî birîndar bîyî.