Serokê Yekîtiya Zanayên Olî yên Herêma Kurdistanê bersiva Emîndarê Yekem ê Hizbulaha Libnanê da û da zanîn ku ew gotin “şovenî” ne.
Serokê Yekîtiya Zanayên Olî yên Herêma Kurdistanê Abdula Weysî ji Tora Medyayî ya Rûdawê re ragihand:
“Sedsala borî li her çar perçeyên Kurdistanê mafên Kurdan hatine binpêkirin û ew rastî karesatên mezin hatine ku ji ber çavkanî û palnerên wan malwêraniyên hizra şoven, mezhebî û dîktatorî bûye.”
Serokê Yekîtiya Zanayên Olî yên Herêma Kurdistanê Abdula Weysî got:
“Li gorî hemû pîvanên asmanî û erdî, Kurd jî wekî hemû neteweyên din xwedî maf in ku doza mafên xwe bikin.
Dirûşm û gotarên li dijî Kurdan û wesifkirina wan a wekî serê mar, hizreke şoven e û agirê fitne û rikê geş dike.
Kurd ne serê mar in, qurbaniyên jehra mar in.”
Emîndarê Yekem ê Hizbulaha Libnanê Subhî El Tûfeylî 3yê mehê di gotareke xwe de anî ziman:
“Rê bidin min li vir ji Sûriyeyê re bibêjim, serê marê Kurd bibirin, eger serê marê Kurd hat birîn li Sûriyeyê her tişt dê bi dawî bibe.
Li Siwêdayê û deverên din ew dengên ne xweş namînin.”
Emîndarê Yekem ê Hizbulaha Libnanê Subhî El Tûfeylî li ser Kurdan axivî û got:
“Hewlek heye ku beşek ji Kurdan teşwîq bidin da ku li dijî avakirina dewleta Sûriyeyê bisekinin û doza parçe û federaliyê dikin wekî Îraq û Libnanê.
Ev jî wêrankirina Sûriyeyê ye û ew vê yekê dixwazin.
Divê Kurd li Sûriyeyê nebin darên destên Siyonîzm û Amerîkayê.”
Subhî El Tûfeylî di navbera salên 1989 û 1991ê de Emîndarê Giştî yê Hizbulaha Libnanê bû û niha jî wekî merciyekî bilind ê Şîeyên wî welatî tê dîtin.
Rûdaw