Bi amadebûna 82 parêzeran li Tehranê, yekemîn Civîna Giştî ya parêzerên Kurd ên endamên Navenda Parêzeran a Tehranê hat lidarxistin û desteya yekemîn a birêvebiriyê ya Koma Parêzerên Kurd a Tehranê hat hilbijartin.
Li Tehrana paytexta Îranê cara yekem Civîna Giştî ya Parêzerên Kurd hat lidarxistin.
Parêzerên Kurd ên ji hemû herêmên Xorasan û Rojhilatê Kurdistanê yên ku endamên Navenda Parêzeran a Tehranê ne, beşdarî civînê bûn.
Heta niha 148 parêzerên Kurd bûne endamên Koma Parêzerên Kurd û di civîna yekemîn a Civîna Giştî ya komê de 82 kesan beşdar bûn.
11 kes wekî endamên sereke û 3 kes jî wekî endamên cîgir ên Desteya Birêvebiriyê ya Koma Parêzerên Kurd a Tehranê hatin hilbijartin.
Du kes ji parêzerên ku hatine hilbijartin jin in.
Parêzer û endamê Desteya Birêvebiriyê ya Koma Parêzerên Kurd a Tehranê Osman Muzeyen derbarê lidarxistina civînê ji Tora Medyayî ya Rûdawê re ragihand:
"Zêdetirî 20 salan e di nav Navenda Parêzeran a Navendî (Tehran) de komeke bi navê Koma Parêzerên Kurd hatiye avakirin ku parêzerên Kurd ên ji Urmiye, Sine, Kirmaşan û Îlamê tê de beşdar bûn lê piştre bi veqetîna navendên parêzeran ên parêzgehan ji Navenda Parêzeran a Tehranê, kom sist bû û hejmara endamên wê jî kêm bû.
Îsal biryar hat dayîn ku kar û barên taybet bi parêzerên Kurd ên li Tehranê birêxistintir û birêkûpêktir bên birêvebirin."
Muzeyen derbarê armanca damezrandina Civîna Giştî ya Parêzerên Kurd li Tehranê da zanîn ku ew dixwazin parêzerên Kurd bi yekrêzî û yekgirtî beşdarî Navenda Parêzeran a Tehranê bibin û roleke zêdetir di birêvebiriya navendê de bilîzin.
Muzeyen diyar kir ku ew dixwazin bi hev re girîngiyê bidin pirsgirêkên yasayî yên ku bi Kurdan re têkildar in û zêdetir alîkariya Kurdan bikin ku pêdiviya wan bi parêzeran heye.