Pênc aliyên Sunî yên ku di hilbijartinên Parlamentoya Îraqê de bi ser ketin, encumeneke hevbeş ava kir.
Li gorî daxuyaniya wan, ev encumen dê bibe "sîwana" hemû partî û hevpeymaniyên Sunî yên Îraqê.
Ew dê di rêya vê encumenê re helwestên xwe hevaheng bikin û nêrîn û biryarên xwe bikin yek.
Serkirdeyên wan pênc aliyan li Bexdaya paytexta Îraqê civiyan û wan daxuyaniyeke hevbeş belav kir.
Wan aliyan avakirina "Encumena Siyasî ya Niştimanî" ragihand. Ev encumen dê helwest, nêrîn û biryarên wan ên li hemberî dosyeyên neteweyî yên cuda bike yek.
Di daxuyaniyê de hat diyarkirin ku "ew encumen dê karê hevbeş di navbera serkirde û aliyên siyasî de bihêz bike."
Wan aliyan her wiha teqezî li ser yekxistina hewldanên xwe kir.
Armanca vê yekê ew e ku ew bi nêrîneke hevbeş ji bo aramiya siyasî û civakî kar bikin, mafên destûrî misoger bikin û nûnertiya xwe ya di saziyên dewletê de bihêz bikin.
Serokê Partiya Bipêşketinê (Teqedum) Mihemed Helbûsî, Serokê Hevpeymaniya Serweriyê (Siyade) Xemîs Xencer, Serokê Hevpeymaniya Ezem Musenna Samarrayî, Parêzgarê Selahedînê Bedir Fehl û Serokê Hevpeymaniya Hasmê Sabit Ebasî di civînê de amade bûn.
Wan aliyan biryar da ku civînên Encumena Siyasî ya Niştimanî di heyama şeşemîn a Parlamentoya Îraqê de bi awayekî rêkûpêk berdewam bikin.
Ev civîna aliyên Sunî bi destpêşxeriya Xemîs Xencer pêk hat.
Xemîs Xencer beriya civînê ji rojnamevanan re got, "Me gotûbêjeke rasteqîn û cidî daye destpêkirin, da ku em nexşerêyekê ji bo pêkanîna sozên xwe, pêkanîna aramiyê û lezkirina diyarkirina serokatiyan deynin."
Xemîs Xencer diyar kir ku dê planeke wan a temam hebe.
Serokê Hevpeymaniya Siyadeyê got ku ew dê li ser çend pîvanan li hev bikin da ku nakokiyên navxweyî deynin aliyekî û di warê avakirina hikûmeta nû de lez bikin.
Aliyên Sunî di hilbijartina 11ê Çiriya Paşîn a îsal de zêdetirî 66 kursiyên parlamentoyê standibûn.