Serok Mesûd Barzanî ji bo helwesta wan a derbarê Rojavayê Kurdistanê spasiya xelkê Kurdistanê kir.
Dema Rojavayê Kurdistanê di bin êrişa çekdarên Artêşa Ereban a Sûriyeyê de bû gelê Başûrê Kurdistanê ji bo alîkariyê seferber bû.
Serok Mesûd Barzanî bi rêya Baregeha Barzanî peyamek belav kir û got:
“Ev helwesta wan dîrokî ye û cihê serbilindî û rûmet û qedirgirtinê ye.”
Peyama Serok Barzanî ev e:
“Bi Navê Xwedayê Mezin û Dilovan
Gelekî spasiya hemû welatiyên delal ên Kurdistanê dikim ji bo bidengvehatina wan a dilsoz, di berhevkirina alîkarî û piştgiriyê de ji bo xwişk û birayên me yên li Rojavayê Kurdistanê.
Ev helwesta wan dîrokî ye û cihê serbilindî û rûmet û qedirgirtinê ye.
Her wiha, destxweşî û spasiyên taybet ji Dezgeha Xêrxwaziyê ya Barzanî û hemû rêxistin û alî û kesayetî û medyayên ku di berhevkirina alîkarî û pêdivî û piştgiriyê de ji bo xwişk û birayên me yên li Rojavayê Kurdistanê de rol lîstiye, dikim û hewl û keda wan bi bilind dinirxînim.
Erkekî neteweyî û niştimanî bi awayê herî baş pêk anîn. Bê guman ev helwest dê bandorê li ser bilindbûna hesta niştimanperwerî û hişyariya neteweyî bike.
Xelkê delal ê Kurdistanê careke din ew rastî ji hemû cîhanê re ducare kir ku gelê Kurdistanê di xweşî û nexweşiyê de hevpar û hevxem û pişt û penaya hev e.”