Sekreterê Civata Wezîran a Herêma Kurdistanê aşkera dike ku pirsgirêkên taybet bi mûçe û neftê yên ligel hikûmeta federal a Iraqê ber bi çareseriyeke dawî ve diçin. Her weha ragihand ku bi vî armancî, şandeke Hikûmeta Herêma Kurdistanê dê serdana Bexdayê bike.
Sekreterê Civata Wezîran a Herêma Kurdistanê Dr. Amanc Rehîm, ragihand: "Piştî rêkeftina sêalî, asta berhemanîna nefta Herêma Kurdistanê zêde bûye û gihîştiye nêzîkî 220 heta 230 hezar bermîlan di rojekê de. Hevdem hewl berdewam in da ku kompanyayên neftê vegerin ser asta berê ya berhemanîna xwe, bi mebesta zêdekirina dahata xezîneya giştî ya Iraqê."
Derbarê dosyeya mûçe û budceyê de, Amanc Rehîm got: "Sê mijarên sereke ku ew jî dosyeya neftê, dahatên naneftî û sîstema ASYCUDA (sîstema gumrikî ya elektronîkî) ne, ber bi çareserbûnê ve diçin. Biryar e hefteya bê şandeke Hikûmeta Herêma Kurdistanê serdana Bexdayê bike ji bo encamdana guftûgoyên dawî li ser van dosyeyan."
Sekreterê Civata Wezîran her weha zelal kir: "Bi çareserkirina van dosyeyan, mijara mûçeyan dê bi temamî cîgir bibe û êdî nabe manşeta sereke ya medyayê, lê belê dê bi şêweyekî rêkûpêk were dabeşkirin. Dabeşkirina mûçeyê meha Gulanê (Gulan) di dema xwe de û wekî navçeyên din ên Iraqê, yekemîn ezmûna serkeftî ya cîgirkirina mûçeyan bû. Em hemû hewlên xwe didin da ku ev pêvajo berdewam be."