PWK: Êrîşên li dijî Leyla Zana û Amedsporê nîşan û berhema dijayetîya Kurda ne

.

Partiya Welatparêzên Kurdistanê (PWK), bi daxuyaniyekê êrîşên li dijî siyasetmedara Kurd Leyla Zana û alîgirên Amedsporê bi tundî şermezar kirin. PWKê destnîşan kir ku ev êrîş nîşan û berhema dijberiya li hemberî Kurdan e.

Daxuyaniya PWKê wiha ye: 

Êrîşên li dijî Leyla Zana û Amedsporê nîşan û berhema dijayetîya Kurda ne

Di hefteya 17emîn a Lîga yekemin a Trendyolê de, Amedspor li deplasmanê bi Bandırmasporê re hat pêşberî hev. Berîya maçê, êrîş û hewildanên provokatîf ên li dijî alîgirên Amedsporê, piştî maçê dijwartir berdewam bûn û di encamê de hinek alîgirên Amedsporê birîndar bûn. Tevî êrîşên berî maçê jî, piştî maçê tedbîrên ewlehîyê yên nehatin girtin; berevajî vê yekê, hêzên ewlehîyê mudaxaleyî alîgirên Amedsporê kirin.

Çêr û heqaretên li dijî birêz Leyla Zana ku li Bursayê dest pê kirin û di maçên futbolê yên li gelek bajarên din de jî hatin dubarekirin, her wiha êrîşên berî û piştî maça Bandırmaspor-Amedsporê yên li dijî alîgirên Amedsporê, êrîşên organîze yên derdorên nijadperest, faşîst û dijî kurd in. Ev êrîş di heman demê de êrîşên li dijî rûmeta jinên kurd in û êrîşên derveyî exlaq û mirovahiyê ne.

Em van êrîşên nijadperest yên li dijî kurdan, êrîşên bêexlaq û li dijî mirovahiyê yên li hemberî birêz Leyla Zana û alîgirên Amedsporê şermezar dikin.

Berî her tiştî, em bang li baroyên Bakurê Kurdistanê dikin ku ji bo destpêkirina pêvajoyên yasayî yên derbarê êrîşên li ser birêz Leyla Zana û alîgirên Amedsporê de bikevin nav hewildaneke aktîf. Em bang li hemû partiyên siyasî yên kurd, parêzvanên mafên mirovan, derdorên werzişê, rewşenbîr û siyasetmedaran dikin ku helwesteke hevpar nîşan bidin. Her wiha em bang li hemû parêzvanên mafên mirovan ên li Tirkîyeyê û hemû aliyên ku li dijî nijadperestî û şovenizmê ne dikin ku li dijî siyaset û helwestên li dijî kurdan dengê xwe bilind bikin.

23.12.2025

Buroya Ragehandinê ya Partiya Welatparêzên Kurdistanê (PWK)

Kurdistan Haberleri

Serok Barzanî: Raperîn hilgira peyama azadîxwazî û îradeya jiyana bi serbilindî ye
PDK: Divê hemî alî bo tenahiya Herêma Kurdistanê û parstina destkeftiyên me bixebitin
Salvegera Raperînê: 35 sal berê gelê Kurdistanê li dijî dîktatoriyê serî hilda
Hevpeymaniya Hêzên Rojhilat: Em ji bo biryara Komelaya Şoreşger kêfxweş in
Termên 87 leşkerên Îranê ji deryayê hatin derxistin