Êvara 25.10.2025ê, li paytextê Swêdê Stockholmê, Komîteya PWK-Swêdê ahengek pîrozbahîya dusalîya PWKyê li dar xist.
Bi beşdarîyek girseyî ya kurdên Swêdê; bi beşdarîya nûner û endamên partî, tevger, dezgehên civakî û kulturî; bi beşdarîya siyasetmedar, rewşenbîr û bîrewerên civaka kurdî li Swêdê û bi taybetî bi beşdarîya hijmarek berbiçav ya malbat, jin û ciwanan şeva pîrozbahîyê, şevek bi aheng û balkêş bû.
Hevkarîya Hêzên Kurdistanê li Swêdê ku 13 partîyên ji her çar beşên Kurdistanê pêkatiye (PWK-Partîya Welatparêzên Kurdistanê, PDK, PDK-Îran, PSK, PDK-Bakur, PDK-S, YNK , Komela –S-K, PSDK-Partîya Social Demokrat ya Kurdistana Başûr, PDKS- El Partî, PDKPK-S, HAK-PAR, Partîya Yekitî-S), Kofederasyona Revenda Kurdistanê û Dîakurdê mesajên pîrozbahîyê şandin.
Piştî xwarinê, hunermend Rizgar û Koma Omera, hunermend Egîd jî bi stranên klasîk, gelerî û govendê şev geş kirin.
Weke tê zanîn; di encama xebatek hevbeş ya yekitîya siyasî û rêxistinî de, PAK (Partîya Azadîya Kurdistanê) û TDK-TEVGERê (Tevgera Demokratîk a Kurdistanê) teva kesayetîyên serbixwe di 9-10ê îlona 2023an de li Diyarbekirê kongreya xwe ya yekîtîyê pêk anîn û di 10ê îlona 2023an de, Partîya Welatparêzên Kurdistanê (PWK) hate damezrandin û weke partiyek eşkere, meşrû û yasayî dest bi xebata xwe kir.
Du salîya Partîya Welatparêzên Kurdistanê (PWK) li miletê Kurd û kurdistanîyan pîroz be!
Buroya Ragehandinê ya Partîya Welatparêzên Kurdistanê (PWK)