Partiya Azadiya Kurdistanê (PAK) ragihand ku berbanga îro Îranê bi 4 dronan êrişî yek ji baregehên wan kiriye û di encamê de 3 Pêşmerge birîndar bûn.
Li gorî daxuyaniya PAKê êriş saet 01:24ê berê sibehê pêk hatiye.
Partiya Azadiya Kurdistanê (PAK) dibêje, "Ev êriş tenê du saetan piştî wê yekê hat ku Serokê Amerîkayê Donald Trump biryara dirêjkirina agirbestê ragihand."
3 pêşmerge birîndar bûn
Di daxuyaniyê de hat gotin, "Di vê êrişê de 3 pêşmergeyên Artêşa Neteweyî ya Kurdistanê birîndar bûn."
PAK vê êrişê wekî "bêwatekirina agirbestê" û "bikaranîna atmosfera aştiyê ya ji bo êrişkirina ser hêzên Pêşmerge" pênase dike.
"Qehremanên şerê li dijî DAIŞê ne"
PAKê bal kişand ser nasnameya birîndaran û got:
"Ew kesên ku berbanga îro bi dronên Îranê hatin armanckirin, qehremanên şerê 3 salan ê li dijî DAIŞê ne.
Her wiha ew kes in ku êrişên 20ê Çiriya Pêşîn a 2017an ên Hêza Qudsê û Heşdî Şebiyê yên li ser Hewlêrê têk birin."
Ji 28ê Sibatê ve 732 êriş
Ji 28ê Sibata îsal ve heta îro, bi 732 dron û mûşekan êrişî Herêma Kurdistanê hatiye kirin.
Di encama van êrişan de heta niha 21 kesan canê xwe ji dest daye û 99 kes jî birîndar bûne.