Hevserokê Ofîsa Peywendiyên Giştî ya Encumena Sûriyeya Demokratîk (MSD) Hesen Mihemed Elî diyar kir ku Hikûmeta Sûriyeyê bersiva Rêveberiya Xweser nade.
Hesen Mihemed Elî li ser pêvajoya dan û standinên Rêveberiya Xweser û hikûmeta Sûriyeyê ji Tora Medyayî ya Rûdawê re axivî.
Mihemed Elî ragihand ku her çend dan û standin bi temamî nehatine rawestandin jî lê hikûmeta Şamê pêvajoyê aloz dike û tenê giraniyê dide dosyeyên ewlehiyê.
"Şam astengiyan derdixe"
Hesen Mihemed Elî diyar kir ku li gorî agahiyên ji fermandarên Hêzên Sûriyeya Demokratîk (HSD) wergirtine, hikûmeta Sûriyeyê di dan û standinan de astengiyan derdixe.
Mihemed Elî her wiha got,"Em nikarin bêjin dan û standinên Şam û Rêveberiya Xweser bi yek carî rawestiyane lê hikûmeta Sûriyeyê astengiyan çêdike û dan û standinan aloz dike."
Lîsteya fermandarên HSDyê bê bersiv maye
Berpirsê MSDyê eşkere kir ku HSDyê di Çiriya Paşîn a 2025an a borî de lîsteyeke ku ji navên fermandarên xwe pêk dihat pêşkêşî hikûmeta Sûriyeyê kiribû da ku tevlî artêşa Sûriyeyê bibin lê heta niha Şamê li ser vê lîsteyê ti bersiv nedaye.
Rola Amerîka û Peymana 10ê Adarê
Hesen Mihemed Elî li ser rola Amerîkayê jî destnîşan kir ku di demên dawî de hinek dan û standin li ser rewşa Heleb û Reqayê çêbûne.
Li gorî gotina Hesen Mihemed Elî Amerîka hewl dide projeya xwe bi ser bixe û dixwaze "Peymana 10ê Adarê" bê pêkanîn.
Şam tenê dosyeyên serbazî dixwaze
Hesen Mihemed Elî teqez kir ku Rêveberiya Xweser amade ye hemû dosyeyan, di nav de dosyeyên aborî û çavkaniyên xwezayî, li gel Şamê gotûbêj bike.
Li gorî gotina Berpirsê MSDyê hikûmeta Sûriyeyê tenê gotûbêjkirina dosyeyên leşkerî û ewlehiyê dide pêş û amade nîne li ser dosyayên din gotubêjan bike.
"Şam tenê dosyeya ewlehiyê derdixe pêş"
Mihemed Elî amaje bi hevdîtinên di navber Şam û Qamişloyê jî kir û got:
“Biryar bû piştî vegera Serokê Qonaxa Veguhêz Ehmed Şer a ji Amerîkayê hevdîtin bihatana kirin lê heta niha dem nehatiye diyarkirin.
Destnîşankirina demê bi Şamê ve girêdayî ye û niha divê hikûmeta Şamê gavan bavêje."