Alîkarê Wezîrê Karên Derve yê Amerîkayê Michael Rigas di merasîma vekirina konsulxaneya nû ya Amerîkayê de got, "Ev avahî sembola hevbeşiya demdirêj a Amerîkayê ye bi Herêma Kurdistana Îraqê re."
Rigas her wiha bangî Bexda û Hewlêrê kir ku mîlîsên girêdayî Îranê hilweşînin.
Konsulxaneya nû ya Amerîkayê ya Hewlêrê ku wekî "konsulxaneya herî mezin a cîhanê" tê naskirin, bi merasîmeke fermî hat vekirin.
Serok Mesûd Barzanî, Serokê Herêma Kurdistanê Nêçîrvan Barzanî, Serokwezîrê Herêma Kurdistanê Mesrûr Barzanî, Alîkarê Serokwezîr Qubad Talebanî û gelek dîplomat û berpirsên payebilind beşdarî merasîma vekirinê bûn
Konsulxaneya herî mezin a cîhanê ye
Kompleksa nû ya konsulxaneyê li ser rûberê 202 hezar û 350 metre çargoşe hatiye avakirin û têçûna wê gihiştiye 796,1 milyon dolarî.
Ev proje wekî nîşaneya giringîdana Amerîkayê ya bi Herêma Kurdistanê û Îraqê tê nirxandin.
Alîkarê Wezîrê Karên Derve yê Amerîkayê Michael Rigas di gotara xwe de ev proje wekî "nîşaneya mîmarî û endezyariya herî baş a Amerîkî" bi nav kir û got:
"Ew konsulxaneya nû ya ku em îro ahenga wê dikin, zêdetir e ji zincîreyek avahî û binesazî; belge ye li ser qîmeta wê pêwendiya ku di navbera Amerîka û Herêma Kurdistana Îraqê de heye."
"Divê mîlîsên girêdayî Îranê bên hilweşandin"
Yek ji xalên herî girîng ên axaftina Rigas, peyama wî ya tund a li dijî komên çekdar û mîlîsên nêzîkî Îranê bû.
Rigas êrişa hefteya borî ya li ser rafîneya gazê ya Kormorê bi bîr anî û wekî "êrişeke terorîstî ya kirêt" pênase kir.
Rigas bangî serkirdeyên Kurd û Îraqî kir û got:
"Em hevbeşên xwe yên Îraqî û Kurd teşwîq dikin ku sûdê ji vê derfetê wergirin, wan mîlîsên ku Îran piştgiriyê dide wan bêhêz bikin û hilweşînin ku tundî û çalakiyên têkder didomînin û tenê ziyanê digihînin serweriya Îraqê."
Herêma Kurdistanê: Dengekî pêbawer
Berpirsê payebilind ê Amerîkayê pesnê rola Herêma Kurdistanê da û tekez kir ku ew "hevbeşekî bibandor ê ewlehiyê" ye.
Michael Rigas wiha axivî, "Herêma Kurdistana Îraqê ya bihêz, aram û xweragir, stûneke bingehîn a wê pêwendiyê ye ku Amerîkayê bi Îraqê re heye.
Em spasiya rola Herêma Kurdistanê dikin wekî dengekî pêbawer li Îraq û seranserê herêmê."
Piştgiriya aborî û boriya petrolê
Di beşeke din a axaftina xwe de, Rigas amaje bi rola şîrketên Amerîkî yên li herêmê kir û diyar kir ku di bin serokatiya Serok Trump de ew giringiyê didin bazirganiyê.
Rigas got, "Em spasdar in ku Hikûmeta Herêma Kurdistanê parêzvaneke bihêz e ji bo berjewendiyên aborî yên Amerîkayê, di nav de girtinaroleke sereke di vekirina boriya petrola Îraq-Tirkiyeyê de ku sûdê digihîne şirketên petrolê yên Amerîkî û alîkariya Îraqê dike li ser rêya wê ya ji bo serxwebûna enerjiyê."
Civîna bi Nêçîrvan Barzanî re
Beriya merasîmê, Serokê Herêma Kurdistanê Nêçîrvan Barzanî û Michael Rigas civiyan.
Di wê civînê de jî her du aliyan tekezî li ser wê yekê kir ku divê encamderên êrişa Kormorê derkevin pêşberî dadgehê û hat gotin, "Çek divê tenê di destê dewletê de be."