Fermandarê Giştî yê Hêzên Sûriyeya Demokratîk (HSD) Mezlûm Ebdî û Hevseroka Daîreya Pêwendiyên Derve ya Rêveberiya Xweser Îlham Ehmedê, li Parîsê bi Wezîrê Karên Derve yê Fransayê Jean-Noel Barrot re civiyan.
Li gorî agahiyên, di civînê de bipêşketinên li Sûriyeyê û pêvajoya entegrasyonê ya bi Şamê re hatin gotûbêjkirin.
Mezlûm Ebdî û Îlham Ehmed her wiha li Parîsê ji bilî Wezîrê Karên Derve Jean-Noel Barrot bi hinek berpirsên din ên Fransayî re jî hevdîtin kirine.
Geşta Ewropayê
Fermandarê Giştî yê Hêzên Sûriyeya Demokratîk (HSD) Mezlûm Ebdî, ji bo dîtina piştgiriyeke aborî û siyasî dest bi geşteke dîplomatîk a li Ewropayê kir.
Mezlûm Ebdî sêşemê li Hewlêrê bi Nûnerê Taybet ê Serokê Amerîkayê yê Kar û Barên Îraq û Sûriyeyê Tom Barrack re hevdîtinek pêk anîbû.
Rawestgeha yekem Îtalya bû
Piştî hevdîtinên li Hewlêrê Mezlûm Ebdî û Îlham Ehmedê dest bi geşta xwe ya Ewropayê kir.
Rawestgeha Mezlûm Ebdî û Îlham Ehmedê ya yekem Îtalya bû.
Mezlûm Ebdî û Îlham Ehmed bi nûnerên Wezareta Karên Derve û Wezareta Parastinê yên Îtalyayê re civiyabûn.
Holenda û Belçîka
Fermandarê Giştî yê Hêzên Sûriyeya Demokratîk (HSD) Mezlûm Ebdî û Hevseroka Daîreya Pêwendiyên Derve ya Rêveberiya Xweser Îlham Ehmed piştî hevdîtinên xwe yên li Fransayê dê geşta xwe ya dîplomatîk a li Ewropayê bidomînin.
Mezlûm Ebdî û Îlham Ehmed dê ji Fransayê derbasî Holenda û Belçîkayê bibin û li wan deran bi rayedarên wan welatan re bicivin.