Fermandarê Giştî yê HSDyê Mezlûm Ebdî li ser pêşhatên dawî yên li Rojavayê Kurdistanê got,” Em ji bo her tiştî amade ne lê em hewl didin şer dernekeve.”
Fermandarê Giştî yê Hêzên Sûriyeya Demokratîk (HSD) ji Konferansa Neteweyî ya Ciwanên Rojavayê Kurdistanê yên li Ewropayê re peyamek şand.
Wî her wiha bang li ciwanên li diyasporayê kir ku xwedî li erka xwe ya neteweyî derkevin.
Ebdî di peyama xwe de tekez kir ku piştî 14 salên şer, Sûriye êdî nikare vegere sîstema berê û pêwîst e Sûriyeyeke nû ya demokratîk û nenavendî bê avakirin.
Wî her wiha got ku ew dê di vê qonaxa nû de bi rêya diyalogê hewl bidin destkeftiyên gelê Kurd biparêzin.
"Em ji bo her tiştî amade ne lê em hewl didin şer dernekeve"
Mezlûm Ebdî diyar kir ku her çend ev çend meh in li Rojavayê Kurdistanê agirbest û aramî hebe jî, metirsiya êrişên nû her tim heye.
Fermandarê Giştî yê HSDyê got, "Em wekî hemû têkoşerên vê dozê divê ji bo her tiştî amade bin. Di heman demê de, em hewl didin ku bi diyalogê careke din şer dernekeve."
Mezlûm Ebdî da zanîn ku ew dê di vê qonaxa nû de bi siyasete û diyalogê hewl bidin ku destkeftiyên xwe biparêzin lê ji bo her îhtimalekê jî amade ne.
"Sûriye nabe Sûriyeya berê, divê sîstemeke nenavendî bê avakirin"
Ebdî tekezî li ser wê yekê kir ku piştî 14 salên şerê navxweyî, êdî Sûriye nikare vegere sîstema navendî ya berê û got:
"14 salên şer ji bo Sûriyeyê bes e. Êdî pêwîst e Sûriyeyeke nû ya demokratîk, nenavendî û pirreng bê avakirin ku hemû pêkhate tê de cihê xwe bigirin. Sûriye êdî nabe Sûriyeya berî 2011an."
Wî her wiha behsa Peymana 10ê Adarê kir û got ku ew çarçoveya nû ji bo hemû gelan guncaw bû û ew dê li ser wî esasî hewl bidin ku bi gav bi gav ber bi çareseriyeke siyasî ve biçin.
Banga li ciwanên diyasporayê: "Erkê xwe yê neteweyî pêk bînin"
Mezlûm Ebdî di dawiya peyama xwe de bangî ciwanên Kurd ên li diyasporayê kir û wiha domand:
"Ez bawer nakim ku ti ciwanekî Sûriyeyî yan Kurd ji keyfa xwe çûbe Ewropayê.
Zulm û zordarî hebûn, şer hebûn. Ciwanekî Kurd li her derê be, divê bi erkê xwe yê neteweyî û Kurdewarî rabe.
Çawa ku bi welatparêziya xwe derketin, îro jî divê bi komelên xwe û li gorî şert û mercên heyî, hemû erkên xwe yên neteweyî pêk bînin."