Endameke Komîteya Navendî ya Partiya Demokrat a Kurdistanê (PDK) aşkere kir, dûrî çavên medyayê, danûstandinên di navbera PDK û YNKê de ji bo aktîvkirina parlamenê û avakirina kabîneya dehem a hikûmetê berdewam dikin.
Endama Komîteya Navendî ya PDKê Lîza Felekedîn Kakayî îro 23ê Tebaxê ji Kurdistan24ê re ragihand, ji ber rewşa aloz a Iraqê û navçeyê, pêwîstiya aliyên kurdî bi yekdengî û yekrêziyê heye.
Kakayî got: "Pêşhat û kêşeyên nû yên li Iraq û navçeyê daxwaz dikin ku aliyên kurdistanî ji bo parastina berjewendiyên bilind ji her demê zêdetir yekrêz bin. Bi rêya diyalog û hevahengiyê, em dikarin saziyên yasayî û rêvebirinê yên Herêmê çalak bikin."
Derbarê pêvajoya avakirina hikûmetê de, Lîza Felekedîn Kakayî aşkere kir: "Dûrî çavên medyayê, danûstandin di navbera PDK û YNKê de berdewam in. Armanc ew e ku xula nû ya Parlamena Kurdistanê dest bi kar bike û di demeke herî nêz de rêkarên avakirina kabîneya dehem a Hikûmeta Herêma Kurdistanê bidawî bibin."
K24