Desteya Giştî ya Amaran a Tirkiyê rêjeya bêkariyê li wî welatî belav kir û da zanîn ku li gor sala 2017ê rêjeya bêkariyê ji sedî 1 zêde bûye û gehiştiye ji sedî 10.8.
Herwiha hejmara bêkaran jî gehiştiye 3 milyon û 531 hezar kesan. Bi awayekî giştî li Tirkiyê 6 milyon û 300 hezar bêkar hene.
Saziya Îş-Kur jî ku taybet e bi rêxistin û dîtina derfeta kar, di raporekê de eşkere kiriye ku hejmara bêkaran piştî krîza aborî û daketina bihayê lîreyê Tirkî, ji Temûza îsal heta Cotmehê 558 hezar kes derbas kiriye. Li gor Îş-Kurê, rêjeya bêkariyê ji sedî 11.3 ye û dawiya sale digihe ji sedî 12.4 û ev yek jî bandoreke gelekî xirab dike.
Ji aliyekî din ve, Fermangeha Şopandin û Lêkolînan a ser bi Sendîkaya Karkerên Şoreşger a Tirkiyê (DISK-AR) jî tekez dike, ku hejmara rast a bêkaran li Tirkiyê 6 milyon kes e.
Li gorî amarên wê fermangeha ser bi DISK-ARê ve, ji Îlona 2017ê heta Îlona 2018ê hejmara bêkaran a netomarkirî gihiştiye 2 milyon û 575 hezar kesan, di demekê de ku hejmara bêkarên tomarkirî 558 hezar kes in. Wate hejmara bêkarên tomarkirî û netomarkirî dike 3 milyon û 133 hezar kes.