Hat ragihandin ku li parêzgeha Siwêdayê ya Sûriyeyê hejmara kuştiyan bûye 203.
Li parêzgeha Siwêdayê ya ku piraniya şêniyên wê Durzî ne di rojên borî de di navbera komên çekdar ên Durzî û eşîrên Ereb ên Bedewî de pevçûnên dijwar derketin.
Hikûmeta Sûriyeyê ji bo kontrolkirina rewşê hêzên artêşê şandin herêmê.
Rewangeha Mafên Mirovan a Sûriyeyê (SOHR) ragihand ku li Siwêdayê hejmara kuştiyan bûye 203.
Ev hejmar piştî pevçûnên roja yekşemê yên di navbera Durziyan û eşîrên Bedewî û hêzên hikûmetê de hatiye tomarkirin.
SOHRê da zanîn ku hejmara kuştiyên “pevçûn û înfazên meydanî yên li Siwêdayê” ji sibeha yekşemê ve gihiştiye 203 kesan" û hejmara qurbaniyan wiha ye:
- 92 Durzî ku 21 ji wan sivîl in û "bi awayekî meydanî bi guleyên endamên wezaretên karên navxwe û parastinê hatine kuştin.”
- 93 endamên hêzên hikûmetê.
- 18 çekdarên Eşîrên Bedewî yên Ereb.