Li Helebê rageşî zêde dibe

Daxuyaniyên hevbeş ên Wezareta Parastinê ya Sûriyê û Hêzên Demokratîk ên Sûriyê (HSD) derbarê êrîşên li herêma Dêr Hafir, li bakurê Helebê, aloziyên li herêmê zêde kirine. HSDê ragihand ku çar endamên wê di êrîşa bi droneyan de birîndar bûne.

Şam: "Îdiayên êrîşê rastiyê nîşan nadin"

Desteya Çapemenî û Têkiliyên Giştî ya Wezareta Parastinê ya Sûriyê îdiayên HSDê yên ku dibêjin "Artêşa Erebî ya Sûriyê sivîlên li Dêr Hafirê hedef girtine" red kir.

Wezaretê diyar kir ku ev îdia "armanca veşartina sûcên ku li herêmên bakur û rojhilat li dijî sivîlan hatine kirin û têkbirina ewlehî û aramiya herêmê ne."

Wezaretê diyar kir, "Artêşa Sûriyê hemû operasyonên xwe bi berpirsiyariyeke tevahî dimeşîne û di vê qonaxê de tenê bersivê dide çavkaniyên terorîst. Artêşa me gundên Humeyma û Keyta, li rojhilatê Helebê, wek bersivek li hember êrîşên ji çeperên HSDê hedef girtin."

HSD: "Hêzên Sûriyeyê sivîl û leşkerên me hedef digirin"

Navenda Çapemeniyê ya Hêzên Sûriyeyê yên Demokratîk (HSD) ragihand ku "komên çekdar ên girêdayî hikûmeta Sûriyeyê êrîşên xwe yên li ser wargehên sivîl û çeperên HSD li dora Dêr Hafir didomînin."

Daxuyaniyê zêde kir, "Vê sibehê, droneke hikûmetê wesayîteke leşkerî li nêzî Dêr Hafir bombebaran kir, sê şervanên me birîndar bûn. Êvarê, droneke din wesayîteke dewriyeyê ya Hêzên Ewlekariya Navxweyî hedef girt, çar şervanên me birîndar bûn."

HSD diyar kir ku bombebaran bi tenê bi hedefên leşkerî ve sînordar nebûye û got, "Herêmên niştecihbûnê yên sivîl jî tên topbarankirin. Ev rasterast jiyana sivîlan tehdît dike û armanc dike ku tirsê di nav nifûsê de biçîne."