Komeleyên Amediyan ên ku li bajarê Bursayê yê Tirkiyeyê çalak in, ji bo piştgiriya tîma Amedsporê li avahiyên xwe alayên bi rengên kesk û sor daliqandin.
Komeleyan ragihand ku Amedspor ji bo wan "nirxekî çandî û civakî ye" û ew dê di her platformê de li gel tîma xwe bin.
Li bajarê Bursayê yê ku hejmareke zêde ya Amediyan lê dijîn, hezkirin û piştgiriya ji bo Amedsporê her ku diçe zêde dibe.
Komeleyên navçeyên cuda yên Amedê yên li vî bajarî, bi mebesta piştgirî û dayîna moralê ji bo tîma xwe, avahiyên komeleyên xwe bi alayên mezin ên Amedsporê xemlandin.
"Amedspor nûnertiya nasnameya me dike"
Komeleyan di daxuyaniyeke hevbeş de tekeziyê li ser yekrêzî û piştgiriya ji bo Amedsporê kir.
Di daxuyaniyê de hat diyarkirin ku Amedspor ne tenê klûbeke werzîşê ye lê nûnertiya nasname û çanda herêmê dike.
Nûnerên komeleyan di daxuyaniya xwe de got:
“Em dê her tim li gel tîma bajarê xwe Amedsporê bin.
Em bi hêza yekker a werzîşê bawer dikin û têkoşîna rengên kesk û sor wekî têkoşîna xwe dibînin.
Wekî Amediyên li Bursayê dijîn, em dê di her qadê de li ser piştgiriya xwe ya ji bo tîma xwe bidomin.”
Ew komeleyên ku alayên tîmê daliqandine ev in:
Komeleya Çûngûşiyên Amedî ya Bursayê
Komeleya Kirmasirtiyan a Amedî ya Bursayê
Komeleya Farqîniyên Amedî ya Bursayê
Komeleya Hênêyiyên Amedî ya Bursayê
Komeleya Pasûriyên (Qulp) Amedî ya Bursayê
Komeleya Bismilliyên Amedî ya Bursayê
Komeleyan di dawiya daxuyaniya xwe de bangî hemû alîgirên Amedsporê yên li her navçeyekê kir da ku bi biryardarî xwedî li tîma xwe derkevin.
Ev çalakî di demekê de ye ku tîma Amedsporê heta niha çendîn caran di maçên xwe yên li bajarê Bursayê yên li gel Bursasporê de, ji aliyê alîgirên wê tîmê ve rastî êrişên nijadperest hatibû.