Li Almanyayê meha Îlonê ji bo diyarkirina çarenivîsa siyasî ya çend herêmên girîng ên wekî Berlîn û Saksonya-Anhaltê gelekî girîng e.
Kolanên van herêman bi wêne û dirûşmên cuda hatine dagirtin lê siyên mezin li ser van hilbijartinan hene.
Ew jî bilindbûna dengên Partiya Alternatîf ji bo Almanyayê (AfD) ye ku bi helwestên xwe yên tund ên li dijî koçberan tê naskirin.
Li gorî rapora dawî ya navenda Infratest Dimapê tê çaverêkirin ku ev partî li herêma Saksonya-Anhaltê ji sedî 41ê dengan bistîne.
Ev yek ne tenê li ser asta herêmî, li ser asta federal jî bûye sedema dilgiraniya partiyên demokratîk.
Amarên Wezareta Karên Navxwe ya Almanyayê amaje bi zêdebûna rêjeya tawanê dikin.
Par 5,5 milyon tawan hatine tomarkirin û ji sedî 36ê desteserkiriyan penaxwaz bûn.
Ev amar ji bo partiyên rastgir bûne keresteyên xurt ên propagandayê da ku bala dengdêran bikişînin.
Li hemberî vê, partiyên wekî Xiristiyan Demokrat (CDU) û Sosyal Demokrat (SPD) di bin zexteke mezin de ne.
Di vê atmosfera siyasî de, dengê Kurdan û biyaniyan ên ku welatiyê Almanyayê ne dê bibe diyarker.
Eger rêjeya beşdariya wan bilind be, ew dikarin rê li ber tundrewan bigirin ku nebin piraniya biryarder.
Marîn Îbrahîm: Dengê xwe bidin
Marîn Îbrahîm li herêma Schleswig-Holsteinê yek ji çalakvanên Kurd e di nav Partiya Xiristiyan Demokrat a Almanyayê (CDU) de ye.
Marîn ne tenê endamê birêvebiriya vê partiyê, di heman demê de karmendê ofîsa birêxistinê ye li bajarê xwe.
Ew bi tecrubeyeke zêde li ser siyaseta Almanyayê ji Rûdawê re axivî û xwest ku hemû Kurd û biyanî dengê xwe bi kar bînin û got:
"Tenê daxwaza min ew e ku hûn beşdarî van hilbijartinan bibin.
Ev tenê rê ye ji bo rêlibergirtina partiya tundrew a AfDyê da ku nebe desthilat."
Kêmbûna koçberiya neyasayî
Marîn diyar kir ku her çend rapirsî dengan zêde nîşan didin jî, divê ev nebe sedema bêhêvîtiyê.
Wî eşkere rexne li propagandayên AfDyê girtin û got ku ew li ser torên civakî pirsgirêkan ji ya heyî mezintir nîşan didin.
Marîn parastina siyaseta hikûmeta Friedrich Merz kir û got ji dema hatina wan ve rê li ber koçberiya neyasayî hatiye girtin û amaje bi amaran da ku meha Tîrmeha 2024an 18 hezar û 503 koçber çûbûn wî welatî lê meha Tîrmeha 2026an ev hejmar daketiye 4 hezar û 311 kesan ango koçberiya neyasayî ji sedî 77 kêm bûye.
Pêdiviya bi destê kar
Marîn girîng dibîne ku koçberiya neyasayî û koçberiya fermî ya ji bo kar ji hev werin veqetandin û eşkere kir ku pêdiviya Almanyayê bi karmendan heye û salane nêzîkî 105 hezar vîzeyên kar ji bo biyaniyan derdixe.
Marîn Îbrahîm got:
"Em dixwazin xelk bi rêyên fermî û konsulxaneyan werin, bi Almanî zanibin û bawernameyên wan hebin da ku yekser bikevin nav bazara kar."
Wî tekez kir ku tevlîbûn, fêrbûna ziman û rêzgirtina ji yasayê bersiva herî baş e ji bo partiyên rastgir.
Di dawiyê de Marîn bangî Kurdan kir ku bi dengên xwe bandorê li encaman bikin û peyameke zelal da:
"Deng bidin, çimkî dengê we li ber avê naçe û dikare paşerojeke baştir ji bo zarokên we garantî bike."
RUDAW