Alîkara Wezîrê Karên Derve yê Amerîkayê ji bo Karûbarên Rojhilata Nêzîk Barbara Leaf diyar kir, piştî biryara Dadgeha Federal a li ser peymanên petrolê yên Hikûmeta Herêma Kurdistanê, Amerîka tu destwerdanê nake û ew di wê baweriyê de ye ku divê aliyê sêyem navbeynkariyê di navbera Hewlêr û Bexdayê de bike û biryara Dadgeha Federal rewşa Iraqê ber bi xerabtir ve dibe.
Barbara Leaf bi daxuyaniyeke rojnamevanî li ser pirsa mijara petrol û gaza Herêmê û biryara Dadgeha Federalî axivî û got: “Di serdana vê mehê de bi Bexda û Hewlêrê, min pêşniyar kir ku her du aliyên nakok ên Hewlêr û Bexdayê, bi navbeynkariya aliyê sêyem, dest bi danûstandinan bikin.”
Leaf eşkere kir: “Çareseriya vê kêşeyê gelek demdirêj bûye û çaverêkirineke mezin li pê wê hatiye û divê ev mijar were çareserkirin û deriyekî yasayî jê re were dîtin û pêwîstiya vê mijarê bi hebûna yasayeke taybet a petrol û gazê heye ji bo çareseriya kêşeyan.”
Di berdewamiyê de da zanîn, ew di wê baweriyê de ye ku peyama wê bi başî gihîştiye Hewlêr û Bexdayê û got: “Ez bawer im serkirdeyên siyasî yên Iraqê li Hewlêr û Bexdayê dikarin mekanîzmayeke nû ji bo gotûbêjkirina vê mijarê bibînin.”
Alîkara Wezîrê Karên Derve yê Amerîkayê ji bo Karûbarên Rojhilata Nêzîk Barbara Leaf destnîşan kir, Amerîka tu helwesteke yasayî û destûrî li ser wê biryara Dadgeha Federal nîşan nade, lê ev biryar rewşa Iraqê baştir nake.