Neteweyên Yekbûyî (NY) bi raporekê hişyariyeke tund da Îranê û ragihand ku ji destpêka îsal ve heta niha herî kêm 841 kes li wî welatî hatine darvekirin.
NYyê diyar kir ku Îran bangên cîhanî yên ji bo rawestandina cezayê darvekirinê paşguh dike.
Hejmara darvekirinan du qat zêde bûye
Li gorî NYyê, tenê di meha Tîrmeha 2025an herî kêm 110 kes li Îranê hatine darvekirin ku ev hejmar du qatê hejmara kesên di heman meha sala borî de ye.
Berdevka Ofîsa Komîseriya Bilind a Mafên Mirov a NYyê Ravina Shamdasaniyê got: "Li gorî agahiyên me, rayedarên Îranê ji destpêka îsal heta 28ê Tebaxê herî kêm 841 kes îdam kiriye.
Îranê gelek daxwazên ji bo tevlîbûna tevgera cîhanî ya betalkirina cezayê darvekirinê paşguh kirine."
Pêkhateyên neteweyî di hedefê de ne
NYyê her wiha bal kişand ser wê yekê ku pêkhateyên neteweyî û penaber bi awayekî sîstematîk dibin armanc, bi taybetî Kurd, Ereb, Belûç û Efxan.
NY: Cezayê îdamê li dijî mafê jiyanê ye
Shamdasaniyê tekez kir ku cezayê îdamê li dijî mafên bingehîn ên mirovan e û got:
"Cezayê îdamê li dijî mafê jiyanê û rûmeta mirovan e. Divê qet ji bo wan kiryaran neyê sepandin ku li gorî yasayên navneteweyî yên mafên mirovan tên parastin."
NYyê di berdewamiyê jî de her wiha hişyarî da ku ji destpêka îsal ve heft kes li cihên giştî û li ber çavê xelkê hatine darvekirin.