Koma Ma'z Êst ku li Bakurê Kurdistanê li ser parastina zimanê Kurdî xebatan dimeşîne, ji bo fêrkirina zaravayên Kurdî, bi taybetî Kirmanckî/Zazakî, sepaneke nû ya mobîl a bi navê "Bimus"ê pêşkêş kir.
Sepana ku bi dersên înteraktîf, lîstik û guftûgoyan fêrbûna Kurdî hêsantir dike, ji meha hezîranê ve zêdetirî 65 hezar carî hatiye daxistin û di demek kurt de eleqeyeke mezin dît.
"Armanca me ew e ku Kurdî li her malê mayînde bibe"
Birêvebirê Stenbolê ya Kovara Ma'z Êstê Keybanû Ertaşê ji Rûdawê re behsa xebatên komê kir û proje wekî encama xebateke salekê pênase kir.
Keybanû Ertaşê derbarê armancên sepana Bimusê wiha got:
"Bimus encama xebata salekê ya Koma Mazestê ye. Armanca me ew e ku li her malê axaftin û nivîsandina Kurdî mayînde bibe.
Em ji bo parastina zaravayên Kirmanckî, Kurmancî û Soranî xebateke girîng dimeşînin."
"Xwendin çekeke neteweyî ye"
Koma Ma'z Êst heft sal in bi awayekî serbixwe li dijî polîtîkayên asîmîlasyonê yên li Bakurê Kurdistanê têdikoşe û vê sepanê wekî gaveke stratejîk a vê têkoşînê dibîne.
Keybanû Ertaşê bi bîr xist ku damezrînerê komê Abdullah Çelîk, bi taybetî ji bo pûçkirina teza "Zaza ne Kurd in" kovarê weşandiye û got:
"Em li hemberî wan kesayetên nezan tekoşîna xwe didomînin.
Ti carî ji bîr nekin, xwendin her tim ilm û marîfetê derdixe holê. Xwendin çekeke neteweyî ye."
Xwendekarekî zanîngehê bi tena serê xwe amade kir
Yek ji aliyên herî balkêş ên projeyê ew e ku sepana Bimusê, bi hemû aliyên xwe yên teknîkî ve, ji aliyê xwendekarekî beşa aboriyê yê zanîngehê Hamza Çelîk ve, hatiye amadekirin.
Keybanû Ertaşê bal kişand ser keda mezin a Çelîk û got:
"Ew bi tena serê xwe salekê li ser projeyê xebitî û ji bo vê projeyê şevên dirêj bêxew ma.
Ger hûn piştgiriya Bimusê bikin, em dê hîn baştir bixebitin û di paşerojê de tiştên xweştir biafirînin."
“Bila zarok bi zimanê xwe bijîn”
Ertaşê di dawiya axaftina xwe de bangî malbatan kir û got:
"Hûn jî Bimusê daxin telefonên xwe û bila zarokên we bi zimanê we hîn bibin û bi zimanê we bijîn."