Di çarçoveya operasyoneke berfireh de bi dehan berpirs û parlamenterên Îraqê bi tohmetên gendeliyê hatin desteserkirin.
Hêzên ewlehiyê yên Îraqê li Bexda û çend parêzgehên din operasyoneke berfireh a ewlehiyê pêk anî.
Li gorî agahiyên destpêkê, hinek berpirsên payebilind, parlamenter û karsaz bi tohmeta tevlîbûna di gendeliyê de hatine desteserkirin.
Hêzeke hevbeş ji Dezgeha Dijîterorê, Artêşa Îraqê, Desteya Destpakiyê û hêzên din ên ewlehiyê sibeha yekşemê (28.06.2026) li navçeya Kesk û çend navçeyên din ên Bexda û parêzgehên din operasyoneke berfireh pêk anî.
Operasyon bi doza "Ednan Cumeylî" yê Alîkarê berê yê Wezîrê Petrolê yê Îraqê yê ku berê hatibû desteserkirin ve girêdayî ye.
Medyaya Îraqê ragihand ku heta niha nêzîkî 20 berpirsan hatine desteserkirin.
Di nav wan de parlamenter, wezîrên berê, berpirsên hikûmetê, şêwirmend, berpirsên ewlehiyê û karsaz hene.
Lê Encumena Bilind a Dadweriyê ya Îraqê û hikûmeta Îraqê heta niha bi awayekî fermî nav eşkere nekirine û ti daxuyanî nedane.
Di heman demê de li gorî medyaya Îraqê, ji hikûmeta Serokwezîrê Îraqê yê berê Mihemed Şiya Sûdanî 2 wezîr hatine desteserkirin.
Parlamenterê Îraqê Şêrwan Dûberdanî beriya niha ji Rûdawê re dabû zanîn ku Cumeylî di lêpirsînan de navê 128 berpirsan daye û di nav wan de navên berpirs û kesayetiyên Kurd jî hene.
RUDAW