Seyîd Riza, kurê wî Reşik Husên û hevalên wî li Dêrsima Bakurê Kurdistanê hatin bibîranîn.
Ew 15ê Çiriya Paşîn a 1937an li parêzgeha Xarpêtê ji aliyê Komara Tirkiyeyê ve hatin bidarvekirin.
Hunermendên Dêrsimî di salvegera bidarvekirina Seyîd Riza û hevalên wî de, li Qada Seyîd Riza kom bûn û bi kilaman ew bi bîr anîn.
Ji bilî gelek kesan Hevseroka DEM Partiyê Tulay Hatîmogullari jî beşdarî çalakiya bibîranîna Seyîd Riza bû.
Xelkê bi xemgînî û kovan guhdariya kilaman kir.
Hunermendên Dêrsimî dibêjin ji bo bûyerên salên 1937-38an neyên jibîrkirin lidarxistina bernameyên bi vî awayî girîng in.
Komkujiya Dêrsimê ya 1937-38an
88 sal berî niha Komara Tirkiyeyê li Dêrsima Bakurê Kurdistanê komkujieyeke mezin li dijî Kurdan kir.
Roja 4ê Gulana 1937an li Parlamentoya Tirkiyeyê biryara “Tevgera Sirgûnkirin û Cezakirina Dêrsimê” (Tunceli Tenkil Harekâtı) hat dayîn û di çarçoveya wê biryarê de Komkujiya Dêrsimê hat kirin.
Li gorî amarên fermî di komkujiyê de 13 hezar û 160 kes hatin kuştin û 11 hezar 818 kes hatin sirgûnkirin.
Rêberê serhildanê Seyîd Riza û hejmarek kesayetiyên navdar ên Dêrsimê 15ê Çiriya Paşîn a 1937an li Xarpêtê hatin bidarvekirin.
Li gorî agahiyan hejmara kuştî, sirgûn û gundên hatin wêrankirin ji amarên fermî gelekî zêdetir in.