Hêzên Sûriyeya Demokratîk (HSD) ragihand ku serê sibehê li bajarokê Behra el-Wustayê yê rojhilatê Dêrezorê di êrişeke DAIŞê de 5 şervanên wan şehîd ketine û şervanek jî birîndar bûye.
Navenda Ragihandinê ya Hêzên Sûriyeya Demokratîk (HSD) di daxuyaniyekê de eşkere kir ku şervanên wan bi awayekî serkeftî bersiv daye êrişeke DAIŞê û ew êriş têk biriye.
Hêzên Sûriyeya Demokratîk (HSD) da zanîn ku DAIŞê li bajarokê Behra el-Wustayê yê rojhilatê Dêrezorê êrişek pêk aniye.
HSDyê di daxuyaniyê de diyar kir ku “5 şervan şehîd ketine û şervanek jî birîndar bûye” û piştî şer û pevçûnên dijwar, operasyonên lêgerîn û şopandinê ji bo girtina DAIŞiyên reviyayî dest pê kiriye.
HSDyê tekez kir ku xwîna şehîdan li erdê namîne û anî ziman:
"Em sersaxiyê ji malbat û hevalên wan re dixwazin û tekez dikin ku xwîna wan li erdê namîne.
Em bi hemû hêza xwe li hemberî van çeteyên terorîst radiwestin û soza tolhildana şehîdên xwe didin.
Em dê hemû kesên ku beşdarî vê êrişê bûne, piştgirî daye yan jî plan kiriye, li gorî yasayê û bi hêza xwe bişopînin."
HSDyê di dawiya daxuyaniya xwe de bangî xelkê herêmê kir ku bi hêzên ewlehiyê re hevkariyê bikin û tekez kir ku ew dê ji bo parastina sivîlan û misogerkirina ewlehiyê operasyonên xwe yên bidomînin.