Parêzgarê Silêmaniyê Haval Ebubekir derbarê şerê di navbera hêzên ewlehiyê û hêzên Lahûr Şêx Cengî de daxuyaniyek belav kir û ragihand ku şer û pevçûn ti pirsgirêkê çareser nakin û daxwaz ji hemû aliyan kir ku ji bo bidawîkirina vê rewşa nexwestî hevkar bin.
Ji doh êvarê ve, hêzeke zêde ya ewlehiyê çûye nêzîkî Otela Lalezarê ya Silêmaniyê ku cihê mayîna Serokê Bereya Gel Lahûr Şêx Cengî ye.
Hêzên ewlehiyê ji Lahûr Şêx Cengî xwest ku xwe radest bike û fermana girtina wî hatiye derxistin.
Piştî saet 03:30 xulekan şer dest pê kir û li gorî wan vîdeoyên ku ketine destê Rûdawê, agir û dûxan ji Otela Lalezarê bilind dibin.
Daxuyaniya Haval Ebubekir wisa ye:
“Şer û pevçûn ti pirsgirêkê çareser nakin, tenê pirsgirêkan aloztir dikin û çareseriyan dereng dixin.
Li pêşeroj û niha, me bi berdewamî hewl da ku rewş negihîje vê qonaxa dijwar û nexwestî û me xwest ku hêza mentiq, lihevtêgihiştin û serweriya yasayê bibe bingeha çareserkirina her nakokiyekê lê mixabin, pêşniyar, diyalog û mekanîzmayên aştîxwaz, herî kêm piştgirî wergirtin.
Em daxwazê ji hemû aliyan dikin ku ji bo bidawîanîna vê rewşa nexwestî û her rûbirûbûn û pevçûneke ku aramî, asayîş û seqamgiriya giştî dixe metirsiyê hevkar bin.”