Rêveberîya Giştî ya Rewşenbîrî û Hunerî ya Wezareta Rewşenbirî û Lawan a Herêma Kurdistanê nivîskar Firat Cewerî hêjayî xelata “Qelema Zêrîn” dîtîye. Xelat di 3yê Adarê de li Hewlêrê bi merasîmekê hatîye dayîn. Cewerî ji ber ku 40 sal in nivîskarîyê dike û heta niha 40 pirtûk nivisandîye, 40 hejmar kovara Nûdem weşandîye hatîye xelatkirin.
Alîkarê Wezîrê Çandê, Walîyê Hewlêrê, helbestvan, nivîskar û rojnameger beşdarî merasîma xelatdayînê bûne ku li Best in Erbil Hotelê pêk hatîye.
Cewerîyî derbarê vê xelatê de ji bianetê re axivî û wiha got:
“Bêguman ez bi vê xelatê pir kêfxweş bûm. Gava mirov ji alîyê welatê xwe û welatîyên xwe ve tê xelatkirin mirov bêhawe dilşa û kêfxweş dibe. Wekî din, ev xelat wek mizgînîya rakirina sînoran e.
“Bi xêra xelatên weha, ew sînorên di navbera kurdan de hatine çikandin, radibin û pirek danûstandinê di navbera kurdên perçeyên cihê de ava dibe. Yanî em li perçeyên cihê bijîn jî, em bi zarava û alfabeyên cihê binivîsin jî, dîsa em pincarê eynî hewşê ne. Bi helwestek weha, pincarê hewşa me êdî bi me şêrîntir dibe.”
Bianet