Raporta çalakiyê
Di roja Şemî, 27.06.2026 de li Düsseldorf semînerek çandî û zanistî bi navê "Dîroka Nivîsandin û Edebiyata Zazakî" bi serkeftin hate lidarxistin. Ev çalakî ji aliyê Kombûna Zanyarên Azad ve hate organîzekirin û hate piştgirîkirin, ku armanca wê pêşxistina zanîn, ziman û çanda Kurdî ye.
Semîner ji aliyê nivîskar û lêkolîner Seyîdxan Kurij (Korûj) ve hate pêşkêşkirin. Wî bi awayek zanistî û berfireh li ser dîroka nivîsandinê ya Zazakî, pêşketina edebiyata wê, xebatên nivîskarên pêşeng û girîngiya parastin û pêşxistina vî zimanî axivî. Di pêşkêşkirinê de gelek mînakên dîrokî û edebî hatin dan, ku bala beşdaran kişand.
Rêvebirina rûniştinê ji aliyê Rêber Hebûn ve hate kirin. Wek rêvebir û xwediyê vê înîsiyatîfê di bin navê Kombûna Zanyarên Azad de, wî bi awayek profesyonel semîner birêve bir, mêvan pêşwazî kir û şertên gotûbêjek azad û akademîk amade kir.
Çalakî bi amadebûna gelek zanyar, nivîskar, çalakvanên civakî û hezkirên ziman û edebiyata Kurdî pêk hat. Piştî pêşkêşkirinê, beşa pirs û bersivan hate vekirin û di navbera mamoste Seyîdxan Kurij û beşdaran de gotûbêjek kêrhatî û berfireh pêk hat. Beşdaran nêrîn û pirsên xwe bi azadî anîn ziman û razîbûna xwe ji naveroka semînerê diyar kirin.
Di dawiya çalakiyê de, Rêber Hebûn spasî mamoste Seyîdxan Kurij û hemû beşdaran kir ji bo beşdariya wan. Wî bal kişand ser girîngiya berdewamkirina van cure çalakiyên zanistî û çandî, ku dibe sedema bihêzkirina ziman, çand û nasnameya Kurdî, herwiha hevgirtina civaka Kurdî li diyasporayê jî zêde dike.
Çalakî di atmosferayek germ, dostane û bi rêzgirtin de bi dawî bû. Beşdaran daxwaz kirin ku Kombûna Zanyarên Azad di pêşerojê de jî van cure semîner û çalakiyên zanistî berdewam bike da ku xizmeta zanîn, çand û civaka Kurdî berdewam be.