Li bajarê Gelsenkirchenê yê Almanyayê Konferansa Ciwanên Kurd ên Rojavayê Kurdistanê hat sazkirin.
Ev konferans ji aliyê Înîsiyatîva Vejînê ve hat lidarxistin.
Armanca wê yekgirtina Kurdên diyasporayê ye, ji bo ku li Rojavayê Kurdistanê jî cudahiyekê bikin bikin.
Vexwendin ji 130 kesan re hatibû şandin ku îro kesayetiyên giring di siyaset û civaka Kurdî de tê de beşdar dibin.
"Bê tevger ne mimkun e ku mirov karibe bi erkê xwe yê neteweyî re rabe"
Fermandarê Giştî yê Hêzên Sûriyeya Demokratîk Mezlûm Ebdî jî peyam ji konferansê re şand û wiha bangî ciwanan kir:
"Tevgera xwe çêbikin, rêxistina xwe çêbikin ku karibin xwe perwerde bikin, xwe zana bikin, hevdû nas bikin, bi hevdû re hereket bikin, planên xwe derxin, karên hevbeş bi hev re bidin meşandin û bi rêya xwe tevgerkirinê re jî karibin bi erkê xwe re rabin.
Bê tevger ne mimkun e ku mirov karibe bi erkê xwe yê neteweyî re rabe."
Gelek nameyên wisa ji kesayetiyên din jî ji bo ciwanan hatin.
"Ciwanên Rojava dikarin li diyasporayê kerên mezin bikin"
Şêx Murşîd Xeznewî dibêje ku êdî erkekî mezin li ser milên ciwanên diyasporayê heye ku nema bi mejiyê penaberiyê jiyan bikin, lê tev li civaka Ewropayê bibin.
Şêx Murşîd Xeznewî wiha pê de çû:
"Gencên Rojavayê di welatên diyasporayê de dikarin karekî gelekî mezin bikin di rîya têkilîyên wan de, di partî û parleman û siyasetmedarên van welatên Ewropayê ku em tê de ne, hem êş û kula Rojava bînin ziman, hem dostaniyê bi wan re vekin, hem wan vexwînin bo Rojava, ziyaretan bikin, rê bê vekirin ji bo Rojavayê Kurdistanê, kesên siyasetmedar û zana û siyasetmedarên Ewropî werin Rojava bibînin, tiştê ku hatiye tehqîqkirin li Rojava, ew tiştê ku ji hikûmeta sûrî dihat xwestin ku gerek biparêze, ku tê de feşel anî, nikaribû, li Rojava îro ew hemî pêkhate hatine parastin."
Înîsiyatîfa Vejîn ev 5 sal çalak e û 32 endamên wê li diyasporayê, Rojava û Başûrê Kurdistanê hene.
Bi vê konferansê dixwaze bigihêja armanceke taybet.
"Em dixwazin di navbera ciwanên li Ewropayê û Rojavayê pirekê ava bikin"
Endama Vejînê Daniel Hassan Alrasoulê armanca konferansê wiha anî zimên:
"Em dixwazin dengê me ji Ewropayê bigihê Rojavayê Kurdistanê.
Em karibin jî di navbera ciwanên li Ewropayê û ciwanên Rojava dimînin pirekê ji wan re ava bikin, tiştê ku em li vê derê li serê kar dikin, em li wê derê bibînin û bînin ser erdê."
Beşdarên kongreyê bi komên cuda balê dikişînin ser pirsgirêkên curbicur yên li Rojavayê Kurdistanê.
Ew ramanan kom dikin ji bo çareseriya wan pirsgirêkan.
Ciwanên Kurd ên Rojavayê Kurdistanê yên ku beşdarî konferansê bûn projeyên xwe pêşkeşî înîsiyatîfê kirin.
Di çarçoveya înîsiyatîfa Vejîn de, ew komên cuda dê karê xwe li ser pirsgirêkên Rojavayê Kurdistanê berdewam bikin.