Şêwirmenda Almanyayê Angela Merkel sala 2015an biryareke dîrokî da û deriyê welatê xwe ji zêdetirî milyonek koçberên ji Rojhilata Navîn re vekir ku beşeke mezin ji wan Kurd bûn.
Niha, deh sal piştî wê pêla koçberiyê, lêkolîneke nû nîşan dide ku ew koçber di bazara kar a Almanyayê de roleke erênî û bi bandor dilîzin û gelek Kurd bûne xwediyên karsaziyên xwe.
Mihemed Ferhanê ji Qamişloyê niha li Bochumê xwedîkar e û berberxaneyek vekiriye.
Mihemed berî 10 salan, di pêla koçberiyê ya 2015an de, ji Rojavayê Kurdistanê gihişte Almanyayê.
Niha, piştî gelek zehmetî û westanê, ew bûye xwedîkar û mînakeke serkeftî ya entegrasyonê ye.
Mihemed Ferhan, Xwediyê Berberxaneyê, çîroka xwe wiha vedibêje:
"Ez di destpêkê de li Qamişloyê berber bûm. Dema ku ez hatim vir, birayekî min hebû û ew jî porbir bû.
Me bi hev re li vî bajarî dikanek vekir. Nêzîkî heft-heşt sal dibe ku min ev dikan li bajarê Bochumê vekiriye û karê me baş e.
Piraniya kesên ku li cem me dixebitin jî xelkê Qamişloyê ne. Zehmetiya herî mezin di destpêkê de ziman bû, heta ku min karî destûrname û mafê rûniştinê werbigirim.
Bêyî wan, mirov nikare kar bike. Her çi qasî tu di pîşeya xwe de şareza bî jî, li vir pêwîst e sertîfîkaya hostatiyê (master) hebe, ku bidestxistina wê jî pênc sal xwendin dixwaze."
Lêkolîn rastiyeke aloztir nîşan dide
Lêkolîna nû, tevî vê serkeftinê, rastiyeke aloztir jî radixe ber çavan, gelek penaberan kar peyda kiriye lê kalîteya karê wan li gorî niştecihên Almanyayê kêmtir e.
Ev yek ji bo siyaseta Almanyayê jî pirsan derdixe holê ku divê ji bo dabînkirina derfetên wekhev çi pêngavên din bên avêtin.
Wezîra Penaber û Entegrasyonê ya Eyaleta Nordrhein-Westfalenê Josefine Paulê li ser vê mijarê got ku "pêvajoya entegrasyonê ji bo siyasetê erkekî berdewam e" û wiha pê de çû:
"Heke rewşa ziman û perwerdeya we baş be, hûn dikarin di demeke kurttir de kar peyda bikin.
Dema kesek ziman nizane, nikare bi temamî beşdar bibe. Ji ber vê yekê em gelekî girîngiyê didin dersên ziman û entegrasyonê û divê em li ser vî karî berdewam bin."
Ji bo bi hezaran kesên wekî Mihemed, entegrasyona di nav bazara kar de rêyeke dirêj û tijî zehmetî ye.
Lê çîroka wan, piştî 10 salan, hem çîroka serkeftin û tevlîbûnê ye, hem jî çîroka têkoşîna li dijî nehevsengiyê ye.
Paşeroj dê nîşan bide ka gelo dê ev serkeftin bi heman awayî berdewam bike yan na.
Rudaw