Cenazeyê Pêşmergeyekî Partiya Azadiya Kurdistanê (PAK) li oteleke Hewlêrê hat dîtin.
Endamekî serkirdayetiya Partiya Azadiya Kurdistanê (PAK) ragihand ku ew li benda encamên lêpirsîna hêzên ewlehiyê ne.
Endamê Serkirdayetiya PAKê Edîb Xalîdiyan ji Tora Medyayî ya Rûdawê re axivî û got, “Ew kesê ku termê wî hatiye dîtin endamê rêxistina me ya nav bajêr bû.”
Berpirsekî din ê PAKê ji Rûdawê re eşkere kir ku ew Pêşmergeyê wan bi demançeya bêdeng û kêrê hatiye kuştin.
Navê wî Soran Mihemedzade ye û li bajarê Hewlêrê dijî.
Xalîdiyan diyar kir ku ew li benda lêpirsîna hêzên ewlehiyê ne ku zanibin bûyer bi çawa qewimiye.
PAK Îranê tohmetbar dike
Edîb Xalîdiyan li ser gumanên xwe anî ziman:
“Em piştrast in ku Soran Mihemedzade ji aliyê Îranê ve hatiye kuştin.
Çimkî berê jî karên bi vî rengî kirine.”
Termê Soran Mihemedzade doh hat dîtin.
Hêzên ewlehiyê li ser çawaniya bûyerê lêpirsînê didomînin.
Partiya Azadiya Kurdistanê (PAK) yek ji partiyên Rojhilatê Kurdistanê ye û baregehên wê yên fermî li Herêma Kurdistanê ne.
RUDAW