Hate ragihandin ku îro 22yê Kanûnê karwaneke din a ku bi dehan malbatên Erebên hawirde tê de cî digirt, ji bajarê Efrînê yê Rojavayê Kurdistanê derket.
Karwan ji 180 malbatên Erebên hawirde pêk dihat û ji Efrînê derket û berê xwe dan cih û warên xwe yên li parêzgehên Sûriyê.
Hêjayî gotinê ye, 18ê vê mehê jî karwaneke ji dehan otombîlan ên malbatên Erebên hawirde ji navenda bajarê Efrînê derketibûn û berê xwe dabûn Şama paytexya Sûriyê.
23ê Mijdarê jî 39 wesayîtên barkirî bi kelûpelên malan ên Erebên hawirde ji Efrînê derketibûn û berê xwe dabûn Şamê.
Serokê Xwecihiya Efrînê ya Encûmena Niştîmanî ya Kurdî, Ehmed Hesen beriya niha dabû xuyakirin, derketina Erebên hawirde ji Efrîn û navçeyên wê berdewam dike û rêjeya mezin derketine, di heman demê de vegera Kurdan bo Efrînê hêsan bûye ji ber ku hemû rê hatine vekirin.