Li navçeya Xozatê ya ser bi parêzgeha Dêrsima Bakurê Kurdistanê ve agirê daristanê ku piştî operasyoneke leşkerî derketibû, di roja 11an de berdewam e.
Li gor agahiyan piştî operasyoneke leşkerî 16ê Tebaxa 2021ê agir li daristanên gundên Danzi, Kurukaymak û Koçeri yên ser bi navçeya Xozatê dest pê kir û ji ber nehatiye midexele kirin agir li gundên derdor jî belav bûye. Ev agirê ku 11 roje berdewam e gîhiştiye gundê Uzunçeşmeyê.
Parêzgarê Dersimê 26ê Tebaxê bi daxuyaniyekê ragihand ku ji ber nebûna rê nikarin agirê li navçeya Xozatê vemirînin.
Lê gundiyên herêmê îddîa dikin ku bizanebûn ti destwerdan nayê kirin û li welatiyan hatiye qedexekirin ku biçin cihê agir û hêzên leşkerî hewldanên ji bo vemirandina agir asteng dikin.
Li Tirkiye û Bakurê Kurdistanê di 3 mehên dawî de li gelek parêzgehan agir bi daristanan ket û ji ber ku ji bo vemirandina agir hewl nehatin dayîn an jî destwerdan dereng hatin kirin, zirareke mezin çêbû.