Çavdêrê Siyasî Îdrîs Zozanî li ser hebûna Heşda Şeibî û Partiya Karkerên Kurdistanê (PKK) li devera Şingalê û cîbicîkirina rêkeftina asayîkirina rewşa Şingalê diyar kir; Heşda Şeibî û PKK bûne rêgir li pêşiya vê rêkeftinê û nahêlin ev rêkeftin ser bigre.
Îdrîs Zozanî ji bajarê Duhokê beşdarî bultena nûçeyan a Kurdistan24ê bû û li ser hebûna PKKê li Şingalê û rêkeftina asayîkirina Şingalê, bersiv da pirsên Jivan Abid.
Zozanî destnîşan kir ku rêkeftina navbera Hikûmeta Herêma Kurdistanê û Hikûmeta Federalî ya Iraqê baştirîn alî ye ku Şingal aram bibe, rewşa Şingalê weke berê bibe, xelkê Şingalê vegere cih û warê xwe.
Îdrîs Zozanî diyar kir: “Mixabin bûye demek Heşda Şeibî û PKK bûne rêgir li pêşiya vê rêkeftinê, nahêlin ev rêkeftin ser bigre. Îro jî li Şingalê prostetoya vê rêkeftinê dikin, derdikevin cadeyan û vê rêkeftinê protesto dikin û qebûl nakin ev rêkeftin bê cîbicîkirin.”
Çavdêrê Siyasî Îdrîs Zozanî dibêje: “Bêguman ajendayên wan ên siyasî yên taybet hene, destekî li pişt wan e jî. Loma nahêlin ev rêkeftin ser bigre li Şingalê.”
Zozanî balê dikşîne ser wê yekê ku rêya herî baş ji bo xelkê Şingalê ku zêdetirî %85ê wan li nav kampan dijîn, ev rêkeftin were cîbicîkirin û xelkê Şingalê vegerin cih û warê xwe.
Ji bo asayîkirina rewşa Şingalê, di 9ê Cotmeha 2020an de di navbera Hikûmeta Herêma Kurdistanê û hikûmeta Iraqê de rêkeftin hat îmzekirin, li gor rêkeftinê; divê hemû hêz û komên çekdar ji devera Şingalê derkevin.
K24