Zanîngeha Dicleyê ya li Diyarbekirê ku sala borî, bi hinceta nebûna destûra Desteya Bilind a Perwerdeyê di beşa Ziman û Edebiyata Kurdî de nivîsandina tezên bi kurdî qedexe kiribû, biryara xwe guherand.
Zanîngeha Dicleyê bi rêziknameyekê ragihandiye ku wê îsal xwendekarên beşa Ziman û Edebiyata Kurdî bikaribin tezên xwe bi zaravayên kurdî yên kurmancî û zazakî binivîsin.
Di rêziknameya nû ya îsal de, destûr hatiye dayîn ku xwendekar dikarin bi ziman û zaravayên din tezên xwe binivîsin.
Zanîngeha Dicleyê sala 2020an ji bilî tirkî bi zimanekî din nivîsandina tezan li xwendekaran qedexe kiribû û bi taybet ji bo beşa kurdî di raya giştî ya Kurd de bertek hatibûn nîşandan.