Hukmatê Yunanîstanî pare kerd ke 2022 de serê sînorê Tirkîya de 1300 bazirganê merdiman ameyê tepiştene.
Yunanîstanî doneyê xo yê serê qeçaxçîtîya merdiman eşkera kerdî. Wezîrê Pawitişê Hemwelatîyan ê Yunanîstanî Takis Theodorikakkosî radyoyê Skaiyî rê qisey kerd û dîyar kerd ke 2022 de teyna nêzdîyê çemê Merîçî yê sînorê Tirkîya de 1300 qeçaxçîyê merdiman tepişîyayê.
Theodorikakkosî da zanayene ke 2022 de 256 hezar multecîyî ameyê astengkerdene ke waştêne Tirkîya ra derbaz bikerê. Goreyê doneyanê Neteweyanê Yewbîyayeyan 2022 de 18 hezar û 800 kesî sey qeçaxan derbazê Yunanîstanî bîyê ke na hûmara 2021 de 9 hezar û 157 bîye.
Yewinê asayîşî yê Yunanîstanî bi paştdayîşê hêzanê Yewîya Ewropa serê sînoranê erd û dengizî de tedbîranê xurtan gênê. La dezgehê heqanê merdiman ê mîyanneteweyî hukmatê yunanan sûcdar kenê ke qeçaxan bi hawayêkê îlegalî erşaweno Tirkîya.
Goreyê îdareyê Atina zî îqtîdarê AKP-MHPyî yê Tirkîya tedaya koçberan keno û înan rê vano 'Şima yan agêrê welatê xo yan zî bi qeçaxî derbazê Yunanîstanî bibê.'