Qezaya Yozgatî Çekerek de, karkerê Kurd ê daristanan semedo ke xerac nêday, rastê hêrişî ameyî û mintiqa ra ameyî vetiş.
Çend muxdarê qezaya Çekerekî, karkeranê Kurdan ra semedê akerdişê çadiran pere waşt. Muxdaran semedo ke cayo ke karkerî tede çadirê xo nayê ro ê dewlete bi înan ra pere waşt.
Karkerê ke dayîşê xeracî red kerd rastî hêrişî ameyî û dima ra hetê muxdaran ra a mintiqa ra ameyî vetiş.
Rojnameger Îsmaîl Kuçukkaya hesabê xo yê medyaya sosyale ser ra beyanatê da û va “Nijadperestê çamveyşanî hêrişê karkeranê Kurdan kerd. Karkerê Kurdî ê ke semedê xebate şîyê Yozgat, çi heyf ke semedo ke çadirê xo cayê dewlete de nayê ro înan ra pere ame waştene. Wexto ke karkeran dayîşê xerecî red kerd, rastê hêrişê grûbêka qelebalixe ameyî û dima ra bêçare mandî ke cayê xo terk bikê.”
Wexto ke hedîse pêhesîyena Qeymaqamê Çekerekî û Şaredarê Çekerekî û cendermeyî şinê cayê ke karkerî tede manenê.
Qeymaqamê Çekerekî karkeran rê vano ke “gere ma asayîşê şima bigîre” û dima ra keno ke karkeran a mintiqa ra vejo.
Cendermeyan karkerî hetanî bajarê Meletî berdî û karkerê Kurdî uca ra bixo şîy heta qezaya Mêrdînî Derîk.