- Ajansa Parastina Sînorên Ewropayê Frontex, sîstemeke nû ya çavdêriyê li ser sînorê navbera Tirkiyê û Yûnanistanê datîne. Ji ber hatina pêla penaberên Efxanî, welatên Yekitiya Ewropayê (YE) dixwazin çavdêriya sînoran zêdetir bikin.
Frontex dixwaze bi teknolojiya balona Aerostatê şopandin û çavdêriyê bihêztir bike.
Frontexê ev sîstema nû li Balafirgeha Alexandropolî ya Girava Limni bicî kiriye û test dike.
Ev balon, bi kamerayên taybet hatiye pêçan û dikare belem û keştiyên koçberên ne yasayî pêşwext bibîne.
Di nava sîstemê de, kamerayên termal û sensorên taybet hene ku rê didin belavkirina sînyalan û bi alîkariya satelîtan jî dikare li ser rûberê 60 kilometreyan, çavdêrî û şopandinê bike.
Ev cîhaz beriya destpêkirina pêla koçberên Efxan hatiye danîn û Berdevkê Frontexê Piort Switalski dibêje, ew rewşa Efxanistan û Tûnis ji nêzîk ve dişopînin.
Herwiha Switalski dibêje "Dê ev sîstema nûjen, çavdêriya deryayan asantir û baştir bike."
Li Yûnanê, bi armanca rûbirûbûna koçberiya qaçax 400 karmendên Frontexê kar dikin.
Rûdaw