Wezîranê Karanê Teberî yê Yewîya Ewropa (YE) derheqê 'polîsanê exlaqî' yê Îranî û 11 îdarekaran de bira ambargoyî daye.
Mîyanê lîsteya ambargoyî ya Rojnameyê Fermî ya Yewîya Ewropa de Serekê Teknolojîya Têkilîyan Îsa Zarepûrî zî tede 11 selahîyetdarê Îranî û 'polîsê exlaqî' zî ca gênê. YE hînî vîze nêdana nê kesan û dest nana malanê înan ê Ewropa ser.
Wezîranê Karanê Zereyî roniştişêkê Luksemburgî de bira ambargoyî tesdîq kerde.
Menga êlule de YE seba ke Îran çalakîkeran rê şîdet keno nêrazîbîyayîşê xo mojnabi.
Wezîra Karanê Teberî ya Almanya Annalena Baerbock eşkerayîya Luksemburgî de vat: ''Wexto ke ma dîmenanê xiraban ê şewatê Zîndanê Evîne vînenê fam kenê ke bi hawayêkê barbarî merdimê haştîgîr, cinî, camêrdî û ciwanî û domanî senî tepişîyenê. Ma çimanê xo na rewşe rê qefilnenê.''
Wezîra Karanê Teberî ya Swêdî Anne Linde îfade kerd ke ambargo 'kesanê ke tadaya çalakîkeran û cinîyan kenê' hedef keno.
Amerîka, Îngilîstan û Kanada vera Îranî wextêkî ra verî birê ambargoyî dabî.