Yalova de beranê keyeyanê 5 elewîyan ser o pê rengê sûrî nîşanê X û 'elewî' ameybî nuştene. Elewîyan vera nayî ewro çalakîya şermezarkerdişî kerde.
Elewîyan vizêr Yalova de seba ke berê înan ameyî deqkerdene û sey hedefî ameyî ramojnayene bi eşkerayîyêke hêriş şermezar kerd.
Serekê Weqfa Kulturê Anadolu yê Haci Bektaşî Velîyî yê Yalova Fîkret Demîr û hemwelatîyê ke berê înan ameyî deqkerdene vera hêrişan beyanatêkê çapemenî day. Çalakîya ke xeylê elewîyî û hetê demokratîkî tewrê ci bîye de Fîkret Demîrî qisey kerd.
Demîrî vist vîrî ke nîşankerdişê bananê elewîyan çîyêko newe nîyo û vat: ''30 serranê peyênan de 27 rey qezaya û bajaranê cîya cîyayan de bi metodan şar ame tersnayene. Êyê ke wazenê bêrê ma ser û pê sînîrê ma kay bikerê wa bizanê ke ma hetê haştîye de yê. Elewîyan de kîn û şîdet çîn o. Ma ganê çewî/e nêvêşnenê û êyê ke gan vêşnenê vera înan vindenê. Gerek înanê ke berê ma nîşan kerdî cade bêrê tepiştene û cezakerdene. Ma hêvî kenê ke nê qewimîyayîşê tarîyî hînî nêbenê.''