Ligor raportekا malpereke pirsa mafê mirov li Îranê xwepêşandanên nerazîbûna rejima Komara Îslamîya Îranê roj bi roj zêdetir dibin û duhê li Rojhilatê Kurdistanê û bajarên Îranê li 7 navendan xwepêşandan hebûne.
Ligor raporta malpera Herana duhê roja yekşemê 08.08.2021ê li bajarên Îranê û Rojhilatê Kurdistanê xwepêşandanên nerazîbûnê yên xelkê berdewam kirine û li Rojhilatê Kurdistanê li Kirmaşan û Nexedeyê û li 5 navendên din xelkê xwepêşandan kirine.
Xwepêşandanên xelkê Îranê û Rojhilatê Kurdistanê ji ber nebûna xizmetguzariyê, av, kareba, kar û bêkariyê ye. Beriya bi 20 rojan ji ber nebûna av û karebeyê li parêzgeha Xuzistanê xelk derketin xwepêşandanan û di wan xwepêşandanan de herî kêm 8 kes hatin kuştin û bi dehan kes hatin birîndarkirin.
Herwiha xwepêşandanên nerazîbûnê li bajarê Nexedeyê jî berdewam dikin. Hemwelatiyê bi navê Ferdîn Îbrahîmî beriya bi çend rojan li Şinoyê ji aliyê tirkekî azerî hatibû kuştin û li ser nerazîbûna xelkê û xwepêşandanê de li Nexedeyê hemwelatiyekî din ê bi navê Mihemed Elîzade jî hatibû kuştin.
Di kurtevîdyoyên ji bajarê Nexedeyê hatine belavkirin tê dîtin ku jimareyeke zêde ya leşkeran li bajarê Nexedê bi cî bûne û bajar mîlîtarîze bûye.
Herwiha Navenda Hevkariyê ya Hizbên Rojhilatê Kurdistanê jî di daxuyaniyekê de bang li kurdên li bajarê Nexedeyê û tirkên azerî kir ku xwe dûr bixin ji tûndiyê û çanda pêkvejiyanê ya bi salan biparêzin.