Dêrsim de hemwelatîyan vera awbendo ke yeno waştene dewa Segedîkî ya qezaya Xozatî de bêro kerdene nêrazîbîyayîşê xo mojna. Hemwelatîyî seba ke awbend do zîret û heywankarîye biqedîno nêwazenê.
Yeno plankerdene de dewa Segedîkî ya qezaya Xozatî de awbend bêro viraştene. La awbend do dewanê Segedîk û Peyîkî binê awe de verdo û zîret-heywankarîye biqedîno. Îhaleya awbendî zî ameye kerdene.
Dewijî vera projeyê awbendî nêrazîbîyayîşê xo mojna û pare kerd ke ê awbend nêwazenê.
Nafîye Arslana ke pê heywankarîye debarê xo kena vat: ''Eke dewa ma binê awe de bimana ma do se bikerê? Domanê ma tîya de bîyî pîl û zewijîyayî. Dewa ma çimeyê debarê ma ya. Ma nê projeyî nêwazenê.''
Nerîmane Varola ke Îstanbul de ciwîyena û hamnanan yena dewe vat: ''Tîya de her çî xozayî yo. Awbend do sîstemê ekolojîkî bixeripno. Ma wazenê wa proje bêro betalkerdene.''
Ercan Yaşarî vat: ''Eke proje bêro kerdene dewa ma do binê awe de bimama. Qet yew faydeyê nê projeyan ma rê çin o. ''
Umutcan Bozkurtî vat: ''Ma nê awebendî nêwazenê. Ê do xozaya ma bixeripnê. Kebanê ma, Munzurê ma estê. Ma pê heywankarîye debarê xo kenê. Awbendêk do zerar bido çimeyê debarê ma.''